صحيفة السوسنة الأردنية

زمان كان عندنا تلفزيون اسود وابيض وكان اله شبكة تقوية على ظهر الحيط وكان فيه مسلسل فارس ونجود (محمود سعيد وسميره توفيق) وكانت الصورة لمّا تكون واضحة..تكون زي خيالك وانته رايح تشتري خبز الظهر...

الشبكة على ظهر الحيط وفيه سّلم بطلعك على الحيط لأنه ما فيش درج ..ومشان نحضر المسلسل كويس لازم تيجي الصورة واضحة ..وكوني اصغر واحد بالسهرة امضّيها طايح طالع ...ولّما تنزل تيجي بعدك هّبه هواء تخلخل الشبكة ...يطّلعوك عالسلم على ظهر الحيط مرات ومرات  ويبقى واحد من تحت يصّيح عليك بصوت عالي كونه فيه هوا تسمعه كل الحارة( لف الشبكة يمين ....لأ كثير لفيتها رجّعها شويه ...لأ لأ راحت الصوره...ارجع لورى شوي  ...رجّعت كثير يازلمه )ونظل على هالحكي ومثله واحنا انلف الشبكة لورا ...لقدام تايخلص المسلسل وتيجي اخبار الثمانيه ...واحنا طيح اطلع وتفرط التعليله وتطيح عن الحيط 

اجريك صارن خشبه ومتربطات

خشمك صار احمر مثل زر البندوره

لفحك الهوا وبتناخط وبتعاطس 

مهدود حيلك قد ما طحت وطلعت 

نمت من التعب وما قريتش ولا حليت واجبك

من الموت تا قمت الصبح عالمدرسه.

وصلت المدرسة متأخر اكلت كتله عالتأخير وكتله مش حال الواجب

وبالمدرسة بسألك زملاك كونه عندك تلفريون شو صار بفارس ونجود مبارح 

ما بدروش فارس مظاها طايح طالع عالسلم ونجود نامت من المغرب