ومضات

شوق - سيمون عيلوطي

mainThumb

13-10-2015 11:02 PM

يا دار شو مِشْتاق
 
أنا يا دار
 
كل شي فيكي
 
عاد بالتّذكار
 
مشتاق للجرّه
 
لـَ كانون النّار
 
لـَ كيلِة الميّه
 
وْتَنْكَة الأزهار،
 
بالصّوره عم بتعود..
 
هَالأفكار
 
عَ الحَصيرِه
 
يلعبو لِزْغار
 
عَ الدّوشك*(1) المَفروش
 
صِدْر الدّار
 
يْعتّب*(2) بحنيّه هَلخِتْيار
 
وْسِتّي تِجْدِل صوف بالصّنار
 
مِنّو بِتِعمَل شَرْشَف
 
يَ سْتار
 
تهديه لَهْلِ الخير...
 
للزّوار
 
وِمْسامَره ما بين جار
 
وْجار
 
بالمنقلِه*(3)عصريّة النْهار
 
يِلعبو، الخسران يا شطّار
 
بيجيب قطايف*(4)
 
بربط الزّنار
 
عاخصرو، يِدْبِك..
 
عا غِنا الأطيار،
 
عيشتْنا أحلى من ندى
 
 
النّوار
 
لا خِصِم عِنّا لا عِدا
 
وْلا ثار...!
 
 
 
...............................
 
1) الدّوشك: دوشك، يشبه الفرشة، يستعمل للجلوس في الديوان العربيّ. 
2) يعتّب: يغني عتابا.
3) المنقلِه: لعبة تراثية.
4) قطايف: نوع من أنواع الحلوى الشعبيّة.
*من المسرحيّة الشعريّة "بنت القسطل" (صفورية) التي ستصدر للشاعر قريبًا.


تعليقات القراء

لا يوجد تعليقات


أكتب تعليقا

لا يمكن اضافة تعليق جديد

إقرأ ايضا

أخبار خفيفة

فنون