صحيفة السوسنة الأردنية

 

مع كل حبة بسم الله ومع كل ضربه ماشاء الله ،، شجر وكروم ،،زيتون وفنون وكاسة شاي وشوية زيت وزعتروزيتون وخبز الطابون وإذا في قلايه بندورة هون المضمون ويلا على  الفطور ،،وبتتشابك الأيادي وبتتغطى الصحون ،، وبثواني ولا لحسة بالصحن بكون ...

 

وبعدها بكل عزم وقوة برجع كل منهم بيتخذ موقعه ....

 

بالرغم من كل العرق والهموم ... بتبقى الضحكة والكلمة الحلوة بتوحد القلوب ...

 

وهيجنة من الحجة ..وسحجة من الختيار ... وسولافه من هون وقصة من هناك ومزحة من فوق الشجرة لهمسة خفيه من تحتها بتكمل شجرة وراء شجرة ... ومع غيبة الشمس بترجع الهمه من جديد وتحويش الأغراض على السريع وشوال الزيتون على الكتف بصير والمشوار بينتهي مع الوصله على الدار ... ومع رنة الجرس من الجار وبإيدة صدر المنسف ، ويلا يا جار يعطيكم العافية لترجع اللمة على اللقمة الهنية من جديد مع نكهة الجيرة غير أكيد ......

 

وثاني يوم ومن بكير شوالات الزيتون بالبكم بتصير ويلا على المعصرة على خير وبركة ....

 

ومن حبه لنقطة بتخلص الحكاية ،، القصة قصة زيتونه بالبركة باللمة والكلمة ،، باللهمة بالمحبة ببركة الشجرة والتراب يلي ضمها وإيد يلي غرسها وكبرها وحطها أمانه بين إيدينا .....