صحيفة السوسنة الأردنية

حكيت والله على هالخبرية غير اخذ الاولاد على مطعم شعبي يمعطوا فيه ساندويشات فلافل وشاورما خليهم يبرطعوا ويشعروا انه فيه قرارات تنزيل اسعار بتمشي بهالبلد مش بس دايما قرارات الرفع هيه اللي بتمشي  .. 

 

المهم دخلنا مطعم صغير وسط مدينة جرش وطلبنا الساندويشات المطلوبة وكان خبري انه سعر رغيف الفلافل لف فيه حبتين فلافل وشحطة حمص ب 15 قرش لأتفاجأ انه سعره صار 30 قرش ورغيف الشاورما خبري فيه انه ب 85 قرش، الزلمه باعنا اياه بدينار ؟؟؟!! بدكوا الصحيح إنصدمت لاني ماكنت حاسب حسابي على الاسعار القديمه .. حكيتله معلش يامعلم .. يبدو انك فاهم الخبر غلط القرار تخفيض السعر بالمطاعم الشعبية مش رفعها ؟؟ الزلمة لد عليه لده فكرته رح يمزعني كف بعديها ضحك حتى صار بده يقع على ظهره وقال شكلك غايب فيله او غايب عن البلد .. حكيتله : ليش يامعلم .؟؟!! حكالي : عمرك سمعت اشي ارتفع ونزل مره ثانيه ..  ؟؟ رديت عليه بالنفي ولكن فيه قرار سمعناه على التلفزبون بتخفيض اسعار المأكولات بالمطاعم الشعبيه .. جحرني جحره حسيت حالي داخل على مطعم خمسه وعشرين نجمه بعدين قال : عمي  اذا عجبك السعر اشتري ماعجبك الله ايسهل عليك ورانا شغل ..  هرشت لحيتي مثل بارد الحيل ولفيت وجهي ومشيت بتلولح من قلة الحيله .. كنت بشعر وانا ماشي انه صاحب المطعم نبطني مسبه بالعضل .. كنت حاب اسمطه وحده زيها بس قلت بلاش ممكن تكون عنده واسطه ويشتكي علي .. مهو الكل صار اقوى من ولاد البلد .. جمطتها ومشيت انا وولادي رغم اني زمان ماكنت اجمط اشي .. قديش كنت احلم انه قرار واحد لصالح ابن البلد الفقير يمشي ويتم تطبيقه بسهوله مثل ما بتتطبق القرارات اللي بترفع الاسعار وبترفع الضرايب وبترفع الضغط  .. لكن فقسني هالملعون .. فقسني .. ومش بس هيك ..  وبيجوز كمان طعمني بالعضل .. انداري