صحيفة السوسنة الأردنية

عزيزي المواطن تعلن الجامعات الحكومية والخاصة والوجوه والجاهات الكريمة عن إطلاق أفواج الخريجين والأعراس لموسم الصيف 2011 فعلى السادة المواطنين ربط الأحزمة والاستعداد للإزعاجات والنقوطات وإذا مش متوفر معك مصاري( وهذا أكيد) شوفلك حدا يداينك لأنك لسه داخل على مناسبات كثيرة ( الله يديم الأفراح) , وإذا كنت عزيزي المواطن لا تمتلك سيارة وتحتاج إلى السير على أقدامك فانتبه وشوفلك طرف سور أو بنكيت عالي اطلع امشي عليه أو غصن شجرة مدلى من عند الجيران وإتعربش عليه هنالك فاردة لواحد متخرج من الجامعة وتقديره( أبصر قديش) أو في فاردة عرس وجايبين العروس والجماعة رايحين عالصالة والمصور اللي طالع من فتحة السيارة بده يصور سيارة العروس والجماعة اللي بحاولوا يكونوا بجانب سيارة العروس بدهم يطلعوا بالصورة.





 وانت غريب ما بصير تتصور وتتجاوز عنهم وتطلع وحتى لو حاولت مارح تقدر لأنهم قايسين الطريق صح وثلاث سيارات مسكرة موكب التخريج أو موكب العرس والشباب بدهم (يخمسوا بالسيارات) واحتمال يسكروا الطريق عليك لانهم وقفوا السير لأجل في صحجة بنص الشارع مع إطلاق للعيارات النارية واحتمال (فشكة) تصيبك, بهمش لا تزعل لأنهم فرحانين بخريجهم أو عريسهم ومش شايفينك( اومش سائلين عنك أصلاً) ومعلنين حالة الطوارئ في المنطقة التي يقطنها الخريج أو العريس وعلى السادة المقيمين في المنطقة والمناطق المجاورة لسكنه ومكان التخريج والمنطقة الواصلة بينهما توخي الحيطة والحذر ودير بالك تزعل أو تتضايق,




 وإذا كنت عزيزي المواطن تمتلك سيارة وفي معك حالة طارئة بطريقك عالمستشفى بعينك الله شوفلك طريق خارجية حتى لو بتصير المسافة أبعد واحتمال ما تلحق الحالة توصل المستشفى لأنك اتأخرت بس لا تزعل نصيبه هيك, وحتى لو كنت مروح عالدار بهمش اتأخرلك ساعتين زمن وأنت (محشوك) مع الفاردة لأنه الفاردة مسكرة الطريق والجماعة فرحانين,




برضه بدك تنتبه عزيزي المواطن لازم توخذ قسط من الراحة لما توصل بيتك (بالسلامة؟) وتنام شوي لأنه بالليل مارح تقدر تنام لأنهم الجماعة جايبين فرقة موسيقية والمطرب بده يطلع مواهبه بصوته الحنون والسماعات لازم تكون عالية وموزعة بحيث الكل يسمع خصوصا مع أصوات القذائف من المسدسات والألعاب النارية يعني دير بالك تقعد عالبرندة أو تفتح الشباك حتى لو الدنيا شوب اتحمل أحسن ما يفوت عليك فشكة طايرة أو مفرقعة مرطبة تناثرت عليك,




 أما أنت يا جدي العزيز أو جدتي العزيزة معلش بدنا نزعجك مارح تقدر تنام لأنه الحفلة مطولة لسه الساعة وحدة ونص بالليل بكير, بس ما تخاف بنزيدلك عيار الدواء أو بنشوفلك حدا تنام عنده ما عندهم حفلة.... وانشالله خير عزيزي الخريج ,عزيزي العريس, عزيزي الفرحان ألف ألف مبروك وانشالله بتتهنى وعيش يومك وانبسط ودامت الأفراح عليكم ,,, وإحنا الله لا يردنا