صحيفة السوسنة الأردنية

وتحدثت سجى في رسالتها التي نشرتها على فيسبوك، عن علاقتها بزوجها محمود، بكلمات مؤثرة أبكت الأردنيين.

 

 

وتاليا نص الرسالة:

 

محمود حبيبي..انا يمكن ما لحقت اشبع منك ومن ريحتك ومن ضحكتك الحلوة بس اخر مرة شفتك كنت مبسوط و راضي عني وبتضحك زي ما بحب اشوفك دائماً مبسوط.. انا عشت معك احلى ايام حياتي انت احلى انسان بالدنيا وانت معي وبعرف حاسس فيي. كتير اشتقتلك! شكراً على كل كلمة حلوة على كل مرة انبسطنا فيها مع بعض انت غير عن الدنيا كلها لو شو ما احكي عنك ما حدا رح يصدق ويمكن يفكروني ببالغ. جواتي شعور غريب وبيقهر انا مش مصدقة اني بودعك وبعد كم يوم حبطل اقدر اشوفك وابوس عيونك واحكيلك قديه بحبك وقديه بحب شواربك ولحيتك وتضحك.

 

حبيبي انت اعز الناس ورح تضل حبيبي و زوجي وقلبي من جوا ان شاءالله الله بيتقبلك شهيد عنده هو احن منا عليك.

 

والله استنيتك وجبتلك بلوزتك من الدراي كلين عشان تلبسها وتسافر فيها قلت برجع اكيد وبلبسها ومشطت شعري بفرشايتك عشان ترجع وتحكيلي وين فرشايتِك... بس افكر فيك ببتسم لانك حلو و عندك احلى قلب

 

 بوعدك رح اضل زي ما بتعرفني ورح اضل قوية عشانك وادعيلك حبيبي ويارب اشوفك بالجنة والله يجمعني فيك رح تضل زوجي وحبيبي .

 

 

انا صليت مبارح ودعيت اني اشوفك والاقيك او اي اشي منك واجيتني بالحلم وحكيتلي انك منيح وكنت زي القمر وقلتلي بحبك وجاي اشوفك شوي وبعدين بحكيلك شو صار ولابس بلوزتك الزرقا اللي بحبها.

 

كنت بدك اتعلم كيف اعمل رز و ملوخية آسفة حبيبي ما عملتك بس ما لحقت والله كنت حتعلم واعملك.

 

اخ يا محمود مو مصدقة انك رحت وتركتني اشتقتلك بطريقة صعبة. شكراً على أحلي عرس بالدنيا شكراً على الاشياء اللي رح تضل معي للابد. حاضر رح اشجع برشلونة واحضر المباريات واحكيلك شو صار.

 

رح اخد التيشيرت تبعت برشلونة بدل اللي كنت حتجيبلي ياها. انا اسفة انك ضليت بالمي لحالك كل هالوقت بس صدقني قلبت الدنيا عليك ما عرفت شو اعمل استنيتك وضليت هناك واحكي هلا بيجي وبحكيلي يلا نقوم ونركب البايك ونروح.

 

قد ماكنت احب البحر هلا مش قادرة حتى اسمع صوته او اشوفه كانت ثواني حبيبي ما لحقت ارجعلك انا اسفة بس الله اختارلك الافضل ان شاءالله. كنت خايفة تكون بردان او جوعان او موجوع بس حمدلله كنت عند ربنا والله حنون وكان معك يا عمري.

 

 

اشتقت لصوتك اشتقت تحكيلي يا سوسوووو يا بطتي. حبيبي استودعتك الله الذي لا تضيع ودائعه يا حبيبي يا روحي كنت و رح تضل احلى اشي بالدنيا ورح اضل زي ما بتحبني و ما حعمل شي ما بتحبه. والله حاسستك معي بس مش شايفتك بس حاسة فيك. بتتزكر بس بستلك ايديك وقلتلك عمرك ما تحرمني منك.

 

حبيبي كل الناس زعلانة وبتترحم عليك وبتقرالك وبتدعيلك وفي ناس فتحولك بيت اجر بمصر شايف قديه الله بحبك؟ الله يرضى عليك ويساهل عليك واشوفك بالجنة حبيبي. ما تنساني وتعالي بالحلم رح استناك. بحبك