صحيفة السوسنة الأردنية

بمناسبة مرور اثنين وأربعين سنة على تأسيس التلفزيون الأردني نقول كل عام وجميع فنانينا الأردنيين بخير وكل من يعمل بالتلفزيون الأردني كل المحبة والتقدير والاحترام لكل عمل وما زال على رأس عمله خلينا نشوف أبو حمدان وحديثه عن الذين أبقوا الأثر الذي يتركه فنانونا الأردنيين في حياتنا وبالديوان خلينا نشوف :




أبو حمدان : صدقني يا أبو سالم مش عارف هالستلايت ما شايف عليه إشي يسر وين ما بتلاقي الكل بنط ؛ أي شوه هاظ أما موديل عاد صارلي ساعة بقلب وما أنا قادر أصل لمسلسل ولا تمثيلية حلوة .



أبو سالم : سقا الله عأيام زمان لما كان التلفزيون الأردني قناتين الأولى والثانية كل إشي كان إله نكهة خاصة



أبو حمدان : صدقت يا أبو سالم ألواحد زمان كان بعرف كل حلقة وينتى بتيجي وأي ساعة بتيجي ويوم الجمعة كان مميز بالمسلسل البدوي الأردني زي وضحى وابن عجلان ويوم الخميس كان بميزه مسلسل حارة أبو عواد ومسلسل (العلم نور) أبياه عهذيك المسلسلات وهذيك الأيام أي الواحد كان يحس بطعم الحلقة ويعيش الجو كأنه مع الفنان بالمسلسل.....



 أبو سالم : هظاك زمان ما برجع وهاظا الزمن مختلف كثير هسا كله فضائيات وخلويات وكمبيوترات وقنوات الإتصال تنوعت وما ظل لا روح ولا نكهة للبرامج بأيامنا؛ أبس فناننا الأردني بظله دايما بالقمة وين ما راح ووين ما أجي وصحيح إنه مر فتره عالفنان الأردني وصار عنده ركود إلا إنه رجع أقوى شوف هسا كل فترة بنشوف فنان جديد ولا يعني هاظا إنه إحنا بننسى عمالقة الفن الأردني اللي صنعوا الدراما بالأردن وعلى سبيل المثال شوف انته نبيل المشيني (ابو عواد ) و هشام يانس الله يشافيه و امل الدباس وعبير عيسى والمرحوم ابراهيم حسن و سمعة (موسى حجازين) و غيرهم من الناس اللي إلهم بصمات واضحة بالمجال الكوميدي على طول صار معروف إنه الأردني إذا بده يضحك لازم يشوف سمعة (أبو صقر) وهسا صار بيه لجانبه (خضرا)رانية إسماعيل وحسن سبايله ) زعل ؛ شوف هاظا الثنائي كيف بمرر الفن بطريقة كوميديه وصاروا يتركوا بصمة بكل دار وبكل مدرسة وجامعة من خلال المضمون المسرحي اللي بقدموه ؛



 أبو سالم : أي والله الواحد بعده بتذكر ضحكة ربيع شهاب الله يشافيه ومسلسلاته الحلوة ألمازة وموزه و ايضا ما بننسى الثنائي حسين طبيشات ( العم غافل ) و محمود صايمه ( حمدي ) .



 أبو حمدان : والله معك حق احنا ما بيوم من الأيام نسيناه بعده بقلوبنا وبنتمنى الله يشافيه ويعافيه مش بس هوه وكل فنان أردني يرقد على سرير العافية زي فنانا الأردني اللي بفنه بين للعالم قديش المسلسل البدوي إله نكهته وجماله وعراقته فناننا جميل عواد نتمنى إله العافية



أبو سالم : الله يسمع منك إحنا كلنا ما بننسى فضل فنانينا وكل واحد غلاته بقلوبنا بتزيد يوم عن يوم مش بس إحنا وكمان سيدنا أبو حسين الله يطول عمره شوف قديش اهتم باللي صار مع فناننا جميل عواد وكيف وداله طياره بكادرها الطبي مشان يجيبوه من المغرب بعد ما تعرض لإصابة وهوه بقلب المهنة وهذا ما سمعناه من العين الممثل القدير نبيل المشيني عن مكرمات سيدنا للممثل الاردني



 أبو حمدان : سيدنا كله مكارم طيبه ولا تنسى كمان كيف إنه تابع صحة الفنان هشام يانس ودايما فضله سابق على كل مواطن بهاظا البلد الطيب.



 أبو سالم : سيدنا أبو حسين بهتم بالفن والفنانين شوف مثلا كيف قلد أوسمه للفنانين مثل إسماعيل خضر وسلوى العاص وعمر العبد اللات ومحمد وهيب وكل فنان اعتبر هاظا التكريم تكريما لكل زملاءه بالوسط الفني والله إنا ما شفنا زي ملكنا .



أبو حمدان: صحيح صدقت ؛ أبس أنا مرات بحب أسمع راديو يا أخي شوف عندك مثلا هاظا بيه برنامج اسمه (بصراحة مع الوكيل ) بقدمه الإعلامي (محمد الوكيل ) هاظا إشي برفع الراس المذيع متمكن وقوي الشخصية وجرئ وبهتم بكل قضايا المواطنين وبتابعها عن قرب مع المعنيين وحتى لو كانوا على أعلى المستويات والمشهور بالمقوله ( يعجبني المسؤول ... ) وبكفي ضحكته اللي بتنعش الواحد عالصبح ومثله كثار أمثال بسام الرقاد كمان أبو غمزه حلوة وابتسامه طيبه الذي نشاهده على قناة نورمينا الفضائيه ،



أبو سالم : الخير بالشباب والفن الأردني بظل موجود بنفس محبينه وكل الكبار بيه ومش بس اللي عايشين واللي فارقوا الفن وهمه بقبورهم ما فارقونا أمثال : وليد بركات وحسن ابراهيم (مرزوق ) وكمان فنانتنا رشيدة الدجاني (أم عواد ) الله يرحمهم جميعا فعلا بصماتهم ظلت محفورة بقلوبنا ودايما بس نشوف الفنان : نبيل المشيني (أبو عواد ) على طول بنتذكر قديش الفن الأردني جميل أنا عارف إنه أبيش مجال نحكي عنهم كلهم بس كلهم إلهم المحبة والتقدير ودايما بظلهم بقلوبنا وما بيوم غابوا عن عيوننا وبعيد التلفزيون بنقول لكل الفنانين وكل عام وهمه بخير ولا تنسو زغروتة خضرا الزغروته الأردنيه اللي بترن وبتملي جونا فرح وسرور ...



 تحياتي و تقديري و احترامي لكل فنان و فنانه ( ممثل و مذيع ) و كل عام وسيدي ومولاي ابو حسين وجميع الفنانين بالف خير إلى اللقا ء مع يوميات أبو حمدان............... في موقع اخر Hikmat_b@yahoo.com