صحيفة السوسنة الأردنية

يحكي أن نوح بن مريم أراد أن يزوج ابنته فاستشار جار له مجوسيا ؛ فقال:إن رئيسنا "كسرى"كان يختار المال ورئيس الروم "قيصر"كان يختار الجمال والعرب كانت  تختار الحسب والنسب ورئيسكم "محمد"(ص)كان يختار الدين فانظر أنت بأيهم تقتدي          .
دعونا نرى من يختار مجتمعنا ضمن يوميات أبو حمدان :::::::::::::::::: ؟؟


أبو السعيد :الله يمسيك بالخير يا أبو حمدان بدنا اليوم نروح عند دار أبو مفلح نخطب لسعيد تعال معنا

أبو حمدان :ياريته صبار بركه ……………يتوجهون لبيت أبو مفلح ومعهم العريس .

بعد حوار طويل ؛أبو حمدان :يا خوي يا أبو مفلح شو طلباتك؟ طبعا الطلبات تعجيزيه !

أبو حمدان :هيه كاينه غير عن بنات الناس؟؛ بدها مهر غالي ،وذهب بلالي ‘ودار بالعلا لي وسيارة وشهرعسل !
وبدها العرس بفندق 5نجوم (بدها عرس أسطوري) بس ولا يهمك يا سعيد غير الله يرزقك أحسن ولا يهمك :وفعلا يتقدم لفتاه جامعيه من عائلة ترى أن الشاب يتمتع بالأخلاق عاليه والرجال أغلى من المال وتبدأ الأفراح ...

أبو حمدان مع أبو السعيد بغناء عذب ((واحنا نوينا عالفرح ويا ناس صلوا عالنبي ))

أبو السعيد وام السعيد والجيران الكل فرحان وبيوت الشعر إشي مثولث وإشي مروبع الله يحي الشباب أبو حمدان يشرف على الزينة وشكات الكهرباء وتجهيزات العرس والشاي والقهوة وبيوت الشعر اشي مفروش واشي بكراسي وفرحك ياسعيد عالعين والراس. وهون بتبدا السيدات تهاهي:وهييه يا ابوحمدان حوطتك بالله. هيه ومن عيني ومن عين خلق الله. هيه ومن عين الحسود اللي ما يذكر الله ..لولوليش وهون ببدأ الطخ (الزغاريت بتحمي للطخ)


 أبو حمدان يا عمي إحنا بدنا هالفرح ينتهي بخير ومن هسا بقولكوا ما بنا طخ سامعين يا شباب الله يحييهم وهنا تنتهي التجهيزات أبو السعيد مسوي غدا لبنايات البيوت وجيرة الله تتفضلوا (البساطه تلف جمالية العرس ) التعليله تبدأ بعد العشاء وبعدها عشا وأبو حمدان يذهب لحضور عرس دعي إليه ومعه ابنه حمدان في صالة بدخل أبو حمدان :وين أبو العريس


وبصير يدور ؛حمدان خلص يابه بنا نقعد ؛أي بنا نظل ندور ؛الأغاني إشي عربي وإشي إفرنجي .شو هاذا؟

؛حمدان:العرسان برقصوا " سلو" أبو حمدان: شو برقصو "بسنو" يابه هاي رقصه على أغنية التايتنك

أبو حمدان : و(الهولو بولو) وين راحت ...بقدم له حلوى (جاتوه) يتشردق فيها أبو حمدان : دق على ظهري يابه هاي ناشفة مش طايحه بحلقي حمدان :هاذا هوه الاتكيت؟ أبو حمدان :على رايك يابه ما بشبع لو بوكل منه باكيت ...المنسف أحسن .....وينك يا أبو السعيد .....الله ستر ما طلعت روحي من( الجاتوه) حمدان : يابه مالك سرحان ؟أبو حمدان بسأل نفسه؟؟؟مش عارف طيب ليش هيك الأعراس صايره ؟شو هالغناني ؟كل واحد بحاله ؟ياترى هاي الصالة قديش كلفت ؟صحيح العرس كويس بس يعني ما إله بهجة (طبعا زفة العريس مستوردة )وما بيه إشي ياحمدان صناعة محلية ....أنا يابه ما بسويلك عرس هيك.؟ مابقبل غير مناسف وسحجه ودحيه ودبكه عالشبابه والقربه وبيوت شعر ومناسف



...؟يغادران الحفلة مع عدم قناعة أبو حمدان بالعرس على هذه الشاكلة؟ترى يابه يا حمدان رح تشوف عرس سعيد كيف ؟؟....بتبدأ التعليله (أول ما نبدا بسورة تبارك عرسك سعيد ياريته مبارك )

( أول ما نبدا نبدا بالزين الله يديمك سيدي أبو حسين ) الزغاريت فوق عند النسوان بالعالي ..........


الشباب عالدبكه والختياريه عالربابه بتربربوا والدحيه والحاشي ( هاتونا الحاشي هاتونه هاتون يا الــ تعرفونه ) والأعلام بترفرف مع شكات الكهرباء وأبو السعيد صاف طابور استقبال مع إخوانه وأم العيد تهاهي وتقول هيه يا أبو السعيد وإخوانه هيه صيوان بوتاده هيه وتقلع عين حساده ..لو ليش وهون ببدأ الطخ أبو حمدان يتوجه للميكرفون مرحب ومحي الكل بس يا إخوان عشان نفرح ما بنا نطلق بارود والعيارات النارية ممنوعة بأمر الدولة والحكومة وأهلا وسهلا بيكوا والله يحيكوا 00وهات زغاريت على أبو حمدان ابن خال العريس يا شباب الكل بكرة بيجي على حمام العريس (كتلة العريس وكب المية عراسه)بالليل الذبايح والعجين خبز الشراك من قبل أم السعيد ومن معها والمعاليق من السلخ للطبخ والقدور عالنار والشباب فرحانه ومأأحلى عرسك يا سعيد الاستعداد للحمام وتنكة ميه عراسه ...



الزفه مشي بالشارع صغار وكبار وأم السعيد عراسها طبق قش عليه بدلة العرس والعطر ومزينة الطبق بعروق زيتون وورد من الحاكورة والجيران وبدخلوا الشباب عالحمام مع العريس (واشنقليله الله يعينك عهالليلة ))
والفارده بتقول بييييب (ويا عريس يا بو حطه منين صايد هالبطة)وهون واربط باب الدار تا تطلع بنت المختار )وبحضروا العروس (يخلف عليكوا كثر الله خيركوا خير الخلايق ما عجبنا غيركو



هنا أستطيع القول أن أبو حمدان محقا في رأيه حيث أن عرس سعيد أعادنا لما كان عليه أباءنا وأجدادنا مما كانت عليه أفراحنا حيث لا بد من التمسك بموروثاتنا مهما اختلف الزمان والمكان فالعرس الأردني عرسا مميزا يعكس الفرح الحقيقي وليس المصطنع ....
فكل التهاني والتبريكات ..............لجميع العرسان ............. واللي عالطريق