صحيفة السوسنة الأردنية

 يزور ديوان أبو حمدان مهنئا ومباركا بحل مجلس النواب //-أبو غازي : الحمد لله إنه الله ما خيب ظني ، وسيدنا الله يطول عمره حل هالمجلس ، بصراحة  أنا المرة هايه بدي أعد للعشرة قبل ما أقول بدي أنتخب هاظا أو هظاك -أبو حمدان : والله معك حق أنا ما بنسى كيف لما زرنا نائبنا بالمجلس وكيف رفض مقابلتنا هاظا وإنت كنت مدير حملته الإنتخابيه وتنكر إلنا أنا ما بنسى هظاك اليوم أبس فعلا الله يمهل ولا يهمل ؛والله يحيي أبو حسين صاحب الهمة والعزيمة القوية ولولا ما إنه شاف وقديش هاظا المجلس أهمل مصالح الناس على حساب مصلحة المواطنين كان ما فض المجلس. أبو  غازي : ما بيه على الله إشي بعيد ،وملكنا الله يطول بعمره ما بترك شاردة ولا وارده إلا ما يقف عندها ويعالجها ولكنه المره هايه اجتث الفساد من أوله الله محييه أبو حسين صاحب الهمة القوية ؛ أبو غازي : معقولة يا أبو حمدان إنه الملك عرف شو اللي صار معانا بمجلس النواب ؛



أبو حمدان : ما بيه على الله إشي بعيد ، وملكنا الله يطول بعمره ما بترك شاردة ولا وارده إلا ما بوقف عليها وبعالجها ، وفعلا لما حل مجلس النواب حط الأمانة  مره ثانيه برقابنا مشان نعرف نختار اللي بدنا إياه يمثلنا بإخلاص

( أبو غازي يتحدث مع أبو سالم وشوه بدك من النائب اللي بدك تنتخبه منهون وطالع خيوه)


 أبو سالم : بتفكر المره هايه غير عن كل مره أنا ما رايح أختار غير النائب المتعلم والفهمان واللي قلبه على الوطن قول وفعل مش شعارات بس عالفاضي ، ولا تنسى ما بدياه نائب عشيرة يمثل بس عشيرته بنا المره هايه نواب وطن  و  شعب بأكمله بمعنى ثاني بدي أختار النائب اللي واعي لهموم الوطن وعارف المشاكل اللي بتواجهنا كشعب بصراحة الواحد زهق من الترقيع بعدين خيوه قد ما بدك ترقع أخر إشي بنشق الثوب ، وإحنا رقعنا كثير بالمجلس اللي انحل وما عاد بيها فايده قد ما بدك ترقع بالأخر ما بتحمل الثوب



أبو حمدان : والله يا أبو غازي معك حق وأنا رايح أوسع نظرتي أكثر رايح أختار النائب اللي بخاف الله وبراعي مصلحة الوطن ، وبراعي مصالح العباد مهما كانت ألوانهم وأشكالهم اللي بهتم بالصغير قبل الكبير تراك ياأبو غازي بعد قرصتك الأولى مش رايح تنقرص مره ثانيه يعني مش النائب اللي وصل للمجلس وبعدها تبرى منا وكأنه ما بعرفنا وأنكرنا ولا كأنه سهرنا وإحنا نشتغل معاه وأخر إشي حلقلنا . على كل حال الحمد لله الأيام التي مضت راحت وإنشاء الله اللي جاي أفضل بجهود المخلصين من أبناء الوطن لأنه لا تنسى يا أبو حمدان إنه تراها إن خليت بليت والدنيا بعدها بخير ما دام أبو حسين فوق روسنا ونبراسنا اللي بشوفه إحنا ما بنشوفه والله يديمه ويديم عرشه


أبو غازي : بالمختصر يا أبو حمدان ( قيس قبل  ما تغيص ) والمرة هايه بدنا نعد للألف  لو إني قريت للخامس أبس مقدور عالعد بمعيتك . أبو حمدان : ولا يهمك تراني بعد عنك وإلك كمان


أبو غازي : وشو رأيك يا أخويه يا ابو حمدان إنك ترشح حالك للانتخابات البرلمانية وتصير نائب وطن بصراحة يا أبو حمدان مش رايحين نلاقي أحسن منك . أبو حمدان : شكلك بتمزح   أبس الله يولينا للصالح من أهل هالبلد اللي لازم يكونوا يد واحده وقلب واحد على الوطن وهمومه .


أبو سالم : إنشاء الله هايه السنة تكون سنة خير وعطاء لجميع الأردنيين ويكون اختيارنا موفق إنشاء الله ويا ريتك فعلا يا أبو حمدان تطيح للانتخابات لأنك شيخ وابن شيخ وانت صاحب واجب وانت والله قدها  وأهل لتمثيل المواطن الأردني خير تمثيل .      


////////////////////////////////////////////////////////////////////////////////////////////////////////


سيدنا الملك عبدالله الثاني حفظه الله ورعاه دايما يجعل الخيارات بأيدينا في ظل ديمقراطية  عودنا عليها مثلما يكن الأب الحاني على بنيه ، دائما ينظر لنا بعين الأمل بأن نكون دائما عند حسن الظن فهو الذي قال : أنتم من ترون المستقبل وتصنعونه ، فأنتم لكم الخير والقرار باختيار مرشحيكم الذين ترون بهم أنفسكم وترون المصير الصحيح هذا هو القائد الذي يصنع أمة بخلقه ونظرته الأسمى لشعبه فنحن الآن على بداية مرحلة جديدة من مراحل الإصلاح التي يمر بها الوطن فلنكن كما  أرادنا أبا الحسين يدا واحدة وقلب واحد فالنائب منكم وإليكم وما دامت الأمور هكذا فلنتعلم من مدرسة  أبا الحسين  ؛ فلن نرضى إلا بالأفضل شأن إرادة مليكنا المفدى هذه الأمانة بين أيديكم وبأعناقكم فلنحافظ عليها فحمى الله الأردن وأدام مليكنا فكلنا تحت ظل الراية الهاشمية وتحت اللواء الملكي الهاشمي //////-


الى اللقاء مع يوميات ابو حمدان .... في موقع اخر