صحيفة السوسنة الأردنية

عندما يعود الموظف من عمله في شهر رمضان ليس أمامه بعد راحته وقراءة القرآن سوى التلفزيون للاطلاع على الأخبار
المتنوعة وأخر ما رصدته السينما العربية من مسلسلات رمضانية وأكيد كل مشاهد له ذوق خاص بالمشاهدة منهم من يتابع
فتاوى وبرامج دينيه ، والبعض الآخر يتابع البرامج الكوميدية أو مسابقات من أجل الفوز بالجوائز والأكثر من الناس ما
يشاهدون المسلسلات التي تتنافس القنوات الفضائية المملة على تقديمها وضمن العائلة الواحدة تختلف الأذواق ومشكله إذا كان بالبيت تلفزيون واحد فقط مثل ما صار مع أبو حمدان .. خلينا نشوف.



 حمدان:تعالي يا حميدة هيهم عادوا باب الحارة تعالي بسرعة مشان تشوفيه بسرعة

أم حمدان : وبعدين معاك إنته ولا أختك بتزهقوش من المسلسلات وبعدين مش مبارح حضرتوه هاظا المسلسل مهمه بعيدوه ومش هسا فقرة الطبخ ،افتحلي يمه على فتافيت ....

 حمدان : ما انتي يمه صارلك عشرين سنه بالمطبخ هسا فتافيت بدهم يعلموكي اشي جديد.. أي والله ما بيه أزكى من شغل دياتك يا ست الحبايب بلا فتوش بلا فتافيت...

 أم حمدان : ما حدا بقدرلك من لسانك الحلو ، بس يمه الواحد طول عمره بظله يتعلم .

حميدة : خلص يمه اليوم محنا عارفين الشيخ أبو حمدان شو بده ... منسف أي هيه فتافيت بدها تعرف تسوي منسف زي اللي إنت بتسويه.

حمدان : الحمد لله شفتي الكلمة الحلوة شو بتسوي .. يله هينا زحلقنا أمي وظلينا نحظر على زوقنا.. الله يستر هسا ما ظل إلا شوية وبيجي أبويه .. أبو حمدان بيجي عالدار ومش شايف الضو قدامه من الشوب وبشلح القظاظه والعقال عالباب من كثر الحر ... وبعد الراحة ... والصلاة هسا بيجي دوره عالتلفزيون يتوجه إلى البر ندة اللي بيها التلفزيون.

 أبو حمدان : ما شاء الله هايه هيه قراءة القرآن يابه عندك وعند أختك ... شوه بشوفكوا بتقطعوا بالمسلسلات .

حميدة : ما انته عارف يابه هسا إجازة وما بيش اشي نتسلى بيه غير التلفزيون .

حمدان : الحمد لله أحسن إشي سوته الوزارة هوه إنه بيه برمضان عطله.

أبو حمدان : ما تقومي يابه يا حميدة تساعدي أمك بالمطبخ .

 حميدة : يابه أمي معدله وبدهاش مساعده وبعدين أنا عليه الجليات وأمي عليها الطبخ إحنا مقسمين الشغل ..

 وانته يابه يا حمدان ....عيونك بشوفهن طول النهار ملزقات بالتلفزيون ... ارحم حالك شويه .... بكفي طول النهار عالتلفزيون وبعدين شو هاظا الدفتر اللي قاظبه بتقلب بيه .

 حمدان : يابه هاظا دفتر مسجل عليه المسلسلات مش قادر يابه أحفظ من كثرهن

 أبو حمدان : قوم من قدامي روح اقرالك جزء ولا جزئين أحسن إلك شو جايك من المسلسلات والحكي الفاضي هاظا مهوه طول السنه بظلهم يعيدوا بيه محنا عارفين كل السنه بصوموا عن التمثيل وكله بشتغلوه بشهر رمضان.

حمدان : طيب يابه اشترينا تلفزيون ثاني حطلياه بغرفتي يعني ما بطلعلي.

 أبو حمدان : غور من وجهي ...

حمدان : بدي أقعد معك أشوف على شوه بتتفرج أبو حمدان يقلب بالقنوات واشي مسلسلات معاده واشي مسابقات وأخر إشي بطلع برنامج بزيارة أسرة فقيرة وتقديم الطرود والمساعدات لمثل هايه العائلات المحتاجة ضمن برنامج على محطة نورمينا اسمه يا سوى يا بتهون وهاظا البرنامج بقدمه مذيع شب حساس كثير(يزن) ، والذي يساعدنا و يجبرنا على البكاء من خلال كلامه المؤثر و العفوي و المحزن و المتميز و انه لايقلد اية شخصيه اعلاميه و ينتج نكهة خاصة في الاداء تجعل الدموع عاجزة عن شكره ....


 تعالي يا أم حمدان تفرجي وشوفي هالمشاهد المؤثرة ولا العائلات اللي زي هايه أكيد يا أبو حمدان بيه مثلها مثايل ويا سيدي الله يخلف على الناس اللي بدعموا هظولا الفقراء والله يجزيهم الخير ....

حمدان : يابه لا تقطع قلبنا بزيادة منا كنت بتفرج عالكاميرة الخفية وبضحك هسا خليتني أعيط ...

 أبو حمدان : الله عليك يا ( يزن خواص )كلك احساس ، ويا ريت هالبرامج هايه تظلها مش بس برمضان ، وتظل الأيادي البيضا دائما داعمة للعائلات الفقيرة والمحتاجة ، وفعلا إعلامنا الأردني بخير ما دام أهل الخير أمثال السيد الشاب نصير الحمود (سفير النوايا الحسنه ) بالبلد والذي قام بدعم هذا البرنامج و اللي بمدوا إيديهم للفقراء ولكل موسر أعطى معسر كان ما بنشوف المشاهد اللي بتقطع القلب من كثر ما هيه حالتها متردية ومزرية .


 حمدان : هسا بدي أضيف هاظا البرنامج عالدفتر مشان أصير أحضره اسمه يا سوى يا بتهون على قناة نورمينا وبنشكر الاسره العامله على هذا البرنامج من المعد لهذا البرنامج عاطف ابو حجر و اخراج محمود طلفاح وجميع الفنانين و الممثلين .


////////////////////////////وإلى لقاء آخر من يوميات رمضانية جديدة . واللى اللقاء مع يوميات ابو حمدان .... في الحلقه الرابعه