صحيفة السوسنة الأردنية

لم يكن أبو حمدان أقلا من غيره من حيث إعداد العزايم الرمضانية للأصدقاء والأهل والأقرباء إلا أن اهتمامه بأخواته البنات فاق جميع الاهتمامات ضمن قالب مختلف ،فها هو يعزم على الذهاب لدعوتهن ؛

 أبو حمدان ينادي بصوت مرتفع على ابنه حمدان :تعال يا ولد يله خلصني طول النهار نايم يله قوم

 أم حمدان : ما تخلي الولد نايم مهوه صايم ؟

أبو حمدان : شو قلتي ؟ هاظ زلمه وعليه مسؤوليات

 حمدان : شو هاظ الواحد ما بعرف ينام بهالدار ؟

أبو حمدان : دايما نايم يله يا ابني خلينا نروح عند عماتك عشان نعزمهم على الفطور ،

حمدان : يابه أسف ما بقدر أنا مرتبط مع الشباب اليوم بنا نروح عند صديقنا رمزي عشان أخوه اللي بالمدرسة صار معاه( أنفلونزا خنازير)ما بقدر

 أبو حمدان : يا ابني يا حبيبي هسا غلط تروحوا بالوقت هاظ لأنه يمكن يكون رمزي عليه أعراض المرض وانتو بدكو تختلطوا بيه ؛يابه الرسول (ص)قال (لا ضرر ولا ضرار ) أنا بقول لو تتأجل الروحة عرمزي

حمدان : بس يابه أنا متظايق على أخوه ، مش لازم الوزارة أجلت القرايه ، يابه ألمدرسه كلها سكروها عشان ما ينعدي أكثر ،

 أبو حمدان : معاك حق لازم أجلوا القرايه ، وعوضو بيوم السبت لأنه اللهم عافينا هاظا وباء سريع الانتشار،

حمدان :زي ما بدك خلص بنروح على عماتي كلهن وبنعزمهن .

 أبو حمدان : شو يابه بشوفك من مناخيرك بتحكي ؛ولك هاظ لو عندك خمس أخوات شو بتسوي ؟؟ هاي هيه صلة الرحم اللي تعلمتها ؛ولك إنت لمين بدك تطلع قطوع ؛ هاظ بكرة حميدة كيف بدك تعاملها ؟؟؟ سنحك ما توقعتك هيك عالحساب ما إنت الحنون ، هظولا عماتك يابه رحمك وأختك كمان ومش بس هنه وخالاتك وبنات خالاتك وبنات عماتك وبنات عمك ، ولا تنسى إنه الله سبحان وتعالى وصى بصلة الرحم لويش إحنا نقطع ،


 حمدان : طيب معاك حق هسا خلينا نروح .

 أم مجدي : أهلين يا أخوي ، أهلا وسهلا، زارتنا البركة ، رمضان مبارك ، يا هلا بالغالي وابنه

 أبو حمدان : أهلين يا خيتي ، ما بدنا نطول عليك أبس إحنا بنا نقعد مع بعض قعده رايقة هيك بالأجواء الرمضانية وانشا الله بكره بتشاركينا الفطور مع خياتك منه بنتشاوف يا خيتي وبتجيبي معك الولاد.

أبو حمدان بدز بحمدان ويوشوشه يا ولد قولك كلمه .

 حمدان : خلص يا عمه بتيجي زي ما قال أبويه

وعند العودة أبو حمدان مخاطبا ابنه حمدان بشوفك انخرست بطلت تحكي ،

 حمدان أنا يابه إنصدمت ما انخرست، اللي سمعته مفاجأة ، معقوله عماتي هالقدي بحبنك ؟ معناته زي هيك أختي حميدة رايحه تحبني

 أبو حمدان ضاحكا : لا يابه ما تنصدم ولا عبالك ، ولا شو يعني، يابه كله حسب الحنان ، وإذا الأخ بحن على أخته الله بحن عليه وبرزقه وبطول عمره وتعال شوف يوم العزيمة

. أبوحمدان : يا هلا بريحة أمي ،يا هلا بخواتي ،نورت الدار ، شايف يابه ماأحلى اللمه ،

 أخواته : إنت ما قصرت ، الله يرزقك ويباركلك بولادك ، وتظل دارك عامره .

 تتعالى الضحكات ويحلو السهر بجمعة خلان وأحباب أبو حمدان .

حمدان : فعلا هايه الجمعات ولا بلاش ،

 أم حمدان : تهلي وترحب وتقدم بأشهى المأكولات والحلويات.


 وهيك قضى أبو حمدان يوم رمضاني جميل مع أخواته وعائلاتهم وكانت جمعه الكل بحكي عنها ولا ننسى إنه مش بس برمضان لازم نتذكر الأرحام لازم باستمرار، ترى بمجتمعنا بيه ناس ناسين هاظا الإشي لدرجة إنهم ما يتذكروا خواتهم , حمدان : معك حق يابه ، فعلا إنك مدرسه ، وإنك أحلى أستاذ بالدنيا ، أنا هسا عرفت شويعني صلة الرحم .  لا أوحش الله منك يا رمضان ، وكل عام وأنتم بخير ، عيد سعيد ، عساكم من عواده ........... و هكذا انتهت حلقات ابو حمدان في رمضان , موعدنا مع ابو حمدان بس يا ترى وين