يا مؤازر المرشح .. لا تعصب ولا تخرب

ومضات

يا مؤازر المرشح .. لا تعصب ولا تخرب

26-10-2010 10:54 AM

ما ظل إلا أيام قليلة وتفصلنا عن العرس الوطني والمشهد الديمقراطي والمطلوب منا جميعا أن نشرف بلدنا الطيب لإنجاح هذا العرس الديمقراطي ، لكن لا يخلو الأمر من بعض الشواهد اليومية في شوارعنا الأردنية وخلينا بجولة بشوارعنا حتى نشوف شوه الرسالة اللي بده أبو حمدان يوصلها لكل مواطن مؤازر لأي مرشح كان.

أبو حمدان مخاطبا أبو سالم :شو مالك بطلنا نشوفك ؟ أبو سالم: ما أنته عارف أخويه أبو سليمان مرشح حاله للبرلمان.

أبو حمدان : الله يوفقه أبو سليمان زلمه قد حاله أبس كيف شايف الأمور يا أبو سالم ؟

أبو سالم : شوف إحنا بخير لولا هالزعرنه هايه والعصبية اللي ما إلها داعي عند بعض المؤازرين يا زلمه بنعلق القارمات من هون وبتلاقيها يا إما حدى معلق فوقيها أو بتلاقيها تمسح تراب الشوارع تقول إنه حدا بيجي بقصها ، وهايه هيه السولافه الواحد مش عرف شو بده يسوي يعني فكرك يحط عند كل قارمة حارس ؟

أبو حمدان : شوف يا أبو سالم الدنيا بدها شوية صبر وسدقني ما بيه مرشح محترم بسوي هايه التصرفات لأنه هايه تصرفات طايشه أكيد بدها تكون من مؤازرين لمرشحين وبتصرف منهم (على راسهم لا بشاوروا ولا بقاولوا ) ما إنته عارف الشباب دمهم حامي ، وكل واحد إله مرشح وبعدين إذا على تمزيع القارمات هاظا ولا إشي بيه بعض مرشحين تعرضوا للضرب وغيرهم تعرض لأذى أكبر زي حرق المقر مثلا ... طيب هاظا طيش ولا شوه .

أبو سالم : الله يعدي هالايام على خير وانشاء الله إنها الأمور بتم على أحسن ما يكون أبس إحنا بدنا من المؤازرين الشباب الهدوء وعدم العصبية لأنها بتثير النعرات وبعدين إحنا مش من أخلاقنا إنا نخرب بالعكس اللي بحب بلده ما بخرب بيها وما بيئذيها لأنه خيرها عليه وعلى كل أهله وحب الوطن من الدين واجب، والمحافظة عليه عبادة والله يهدي.

أبو حمدان : شوف يا أبو سالم كلنا لازم نحارب الظواهر السلبية ونحط ضوابط أنا من عندي وانته من عندك وأخوك وجارك وابن عمك وكلنا إيد بإيد ونتذكر إنا كلنا أسرة واحدة ببلد واحد وبرلمان واحد وكلنا تحت ظل الراية الهاشمية نفتخر ونباهي ونتباهى ومشان إحنا بنحب أردننا لازم نكون قدوة لغيرنا حتى العالم يشهد بأنه هاظا البلد بلد مبارك فيه الخير ومنه الخير ولا التعصيب ولا التخريب من شيمنا وأنا بتمنى إنه ننتخب الشخص المناسب اللي بخاف عالبلد ولازم ما نعصب ولا نثيرها ولا نخرب ونتذكر إنه الصوت أمانه لازم نعطيه للشخص اللي بستحقه واللي ببيع صوته بكره ببيع وطنه ، واللي يشتريك بقرش بكرة ببيعك وببيع ولادك وببيع وطنه ببلاش ، ولا تنسوا يا أردنيين إنه القرار بأديكوا إنتوا اللي بتختاروا ولازم تختاروا صح حتى ماتندموا ولا تنسوا إنه النواب هم عيون المواطنين على الحكومة ، وهم المشرعين ، لا تظلموا أنفسكم ولا تظلموا غيركم ، فكر صح ، اختار صح ، صوت لمن يستحق ولا تنسى بيع الصوت حرام شرعا .

نتمنى للبلد يوم 9 آيلول يوم التغيير.

ومهر الأردن غالي ولازم نقدم أحلى صورة للبلد ونخلي العالم كلها تتفرج علينا وتعرف بالروح والدم بنفدي ملكنا ابو حسين و هالبلد وترابه الحر...

وإلى اللقاء في يوم 9/11/2010 ونناشد جميع نشامى و نشميات الوطن بالتصويت ، نعم لانتخابات 2010 ... والى اللقاء مع يوميات ابوحمدان ..... في موقع اخر ( يا ترى وين )