صحيفة السوسنة الأردنية

زمان كانوا يحكولنا "من جد وجد"، يعني من باب التشجيع على الدراسة، بس للاسف ولامرة حكولنا شو اللي وجده هذا اللي "جدّ" .. يعني وجد اشي محرز واللا انه "وجد" ونقطة .. وبعدين هو الولد متعّب حاله دراسة ودروس و"سهر الليالي وما في حلو على بالي" عشان في الآخر يطلع "وجد" وبس؟؟!!!

طيب إنه مثلاً "جدّ" ف "وجد" مقعد جامعي، أو "جدّ" ف "وجد" بعثة الى الخارج لاستكمال الماجستير او الدكتوراه ، أو على القليلة "جدّ" ف "وجد" وظيفة حكومية ..

الله يسامحك يابا ويسامحك يا أستاذ سامي بالمعية اللي ضليتكم تحكولي "من جد وجد" لأكتشف لاحقاً أن من جد وجد ولكن ماذا وجد :

من جد وجد المقعد الجامعي محجوز للمكرمات والأغنياء

من جد وجد البعثات الدراسية محصورة بأبناء رئيس الجامعة وأقربائه و"مريديه"

من جد وجد الوظيفة الحكومية للواسطة والمحسوبية

 عزيزي المواطن اللي ماخذها "جد" .. روح بارك لدولة الرئيس عبدالله النسور بتعييين ابنه "البكر" بمنصب سفير فوق العادة –يعني مش سفير عادي .. هذا بيكون سفير فوق العادي بشوي- ، وانت راجع من "المباركة" تذكر الحكمة التي قالها عادل إمام: "اتكل على الله واشتغل رقاصة" ...  وآخر دعوانا أن الحمد لله"