صحيفة السوسنة الأردنية

 

 صفينا ايدنا عالبلاطه حتى البلاطه

 ملّت من خطاوينا..

 وصفينا ركام يانادر اسمك .. ليش

 بدك تمسح كل اسامينا..

 وصفينا ايد تلوي الايد بعد ما احتار

 الوقت كيف   يلوينا..

 ***

 وبطلنا نعرف ننام بعد

 ماكانت هنا كلها ليالينا..

 وصفينا نقول للي يموت روح اخّلص

 من قهرنا ومن

  بلاوينا..

 

 ***

 

 وطولنا اللحايا وقصرنا الثياب

وصار بأسم الحيتان تطلع كل

فتاوينا..

 وصرنا نخلط الحابل بالنابل

 اللي ما في يوم واحد ارتاح فينا..

 وصفينا نعيد بالتاريخ

ولعصر الجاهليه

 اليوم يا زيد تودينا؟؟!!!..

***

 ولا كأنا اول حضاره

  صارت على الارض

ولا كانها معركة مؤته صارت باراضينا..

 ولا كأنه الدنيا كلها بالكرامه ما سمعت فينا

حتى الموت كان يخاف لما يسمع بطارينا

 

***

ولا كنا لما الواحد ينظام

نفداه بدمنا ومصارينا

شو سوت البورصه فينا

ياللي بالحق ترضينا

راح نصير كاتل ومكتول

ولا فيه الله يرحمنا

ولا الله يعيينا

 

***

راح ينسرق من ليالينا مسامر الخلان

وراح ينقطع وصل حبهم من شرايينا

 راح نحرم كل نكته تخطر عالبال

وراح تصير بس ورى اللقمه اغانينا

 

***

وصفينا عالحديده..ولا قرش

ولا قرش حاضر ولا جديد ولا ماضي

اللي يواسينا

   نهاجر نقول بلكي بال الواحد يهدا برا

 وتتحقق كل امانينا..

 

***

 

ولما نفرح بسكوت نبكي بدمع مهضوم

لانو فرحتنا تغص بكل بلاوينا

كل اللي كان بدنياه

نربي اولادنا ونعيش بخشه تلفينا

ما بكفي دفع ايجار وفواتير

حتى حبة القاتو حرام علينا؟!!

راح العيد وايام العيدوالقرش صار بعيد

لا عيديه للعنايا

ولا هديه للصبايا

وويلــــــــــــــي على حظ الولايا

 

***

 وانتو يا زيد وعبيد

راح اسولف للفجر

مثل الجمل نحرتونا نحر

ولميتوا العالم علينا

ومين وصلنا لهون؟

راح تقولوا وصلنا بايدينا…

انتو ما بتعرفوا معنى الطفر

والراتب ما بيوصل لخمسه الشهر

وغلا الاكل..وولدين ببنطلون

بس هاااااااااااا وقفوا

والله الحق مو عليكو

الحق علينا