صحيفة السوسنة الأردنية

هالعالم ما بينحزن عليه

يمكن لما تكبري البراءة اللي بعينيك تضيع

لما تشوفي الناس كيف بالناس بتشتري وبتبيع

والحب اللي بتعيشيه ينقلب جحيم

ويهجر قلبك الاحساس، وتصيري متلك متل باقي الناس

لا تحزني عالحلم اللي ما قدرتي تحققيه

في ناس بتعيش بالاحلام، وبتضيَعها الاحلام، ويطلعو من الدنيا متل ما دخلوها

وما في حلم بينحزن عليه لأنه ضاع...لأنه بالآخر كل شيء مصيره الضياع

الشمس لما بتشرق بتنتهي بالغروب

الطير لما بيهاجر مصيره يرجع لعشه بالآخر

وبترجع الدنيا بتدور، الحي بيقلب ميت، والميت ما بيرجع لو شو ما صار

والناس اللي بقلوبها الكره، مصيره الكره يولع بقلبهم نار

والناس اللي بدها الحرب، بتدمرهم الحرب اول ناس

لا تحزني عاللي ما حبوكي

عاللي بدلو ياسمينك بأشواكهم وجرحوكي

لا يعرفون ان الحياة ستنتصر بشكل او بآخر

وبأن الله يمهل ولا يهمل
مي شحادة