الوطني : بتعرف يا فاسد إنا غير نضل وراكو وراكو حتى نقضي على كل واحد فاسد سواء كان حرامي سرق مصاري أو أراضي أو ارتشى من تحت الطاولة ومش بس هيك ولك حتى إلي جعل الوزارة مزرعة اله رايحين نضل وراه وراه حتى نحبسه .
الفاسد : ولك والله انك مسكين وما بتعرف أشي ولك أصلا انته متخلف وانتو عبارة عن اسم بالهواء قال وطني وشغل خطابات وشعارات ولك شو الوطنية الي بتحكي عنها ولك إحنا أراضي الدولة وغاباتها سرقنها ولك المينا الوحيد الي محرم بيعه عند كل الدنيا اشتريناه على الورق وابخس الأثمان وللحقيقة أحنا سرقناه عينك عينك ولك مش بس هيك يا هبيله ما ضل اشي إلا اشتريناه قصدي سرقناه تحت شعار السرسره قصدي الخصخصة قال مشان تسدو المديونية فعلا أنكم قليلين عقل يا وطنيين ولك تفرج على النتيجة المديونية زادت خلال أربع سنوات 8 مليارات فهمت يا أهبل قال وطني ولك إذا ما بتعرف أحنا الفاسدين والحراميه والماسونية أقوى ناس على الساحة وإحنا أصحاب الكلمة الفوقا وإحنا أذا من قال فعل ولك إحنا مش بس سراقين وحراميه وفاسدين ولك احنا الي منحط ناس بمجلس النواب تشرع لنا السرقة والحرمنه ومش بس هيك ولك حتى إذا بنشوف واحد مستلم منصب ونزيه وأيده نظيفه ومحترم وصاحب خلق بنضل وراه وراه وبنوديه ورا القمر يعني بنجبره على الاستقالة او منلبسه تهمه او بنشفق عليه ومنعلقه على الرف يعني استيداع حتى تعرف يا صاحب الوطنية انه احنا الفاسدين والماسونيين باعنا طويل مثل الإخطبوط ولا يمكن لأحد أن يقف بوجهنا .
الوطني : ولك شو هالحكي الي بتحكيه ولك معقول بتقدروا على كل هالحكي والله شقلبتلي عقلي ولك هاي مجلس النواب بده يحط قانون لمحاربتكم وكمان الحكومات الي راحت والحالية والي جايه كلهم بحلفوا اغلب الإيمان والطلاق من نسوانهم أنهم غير يقضوا عليكم شو بتفكر انته مهبول هي الشغله فالته والله سويتها وخليتها مثل لحم الضحايا على كلامك يعني الشاطر الي بلحقله اشي يسرقه أو ينهبه ولك قول غير هالحكي جلطتني .
الفاسد : علي الضمان انك بتخلط مي وزيت واسلاكك ضاربه ولك النواب الي شاد ظهرك فيهم ثلثينهم فاسدين وعليهم قضايا ولك لد لمجالس النواب الي ورا بعضها ولك همه الي شرعولنا الفساد بقوانين وهمه الي شجعونا وجعلونا نكون فاسدين وهمه الي استفادوا من فسادنا أما الحكومات يا مسطل لا تسولفش الشاطر منهم الي بلهط قد أيده ما بتطول والي ايد ما بتطول بجيب ابنه أو نسيبه او قرايبه أو صديقه من بعده علشان يكمل اللهط .
الوطني : ولك إذا الي بتحكيه صحيح والله خليتني اهذول واهلوس وامشي شقلبه ولك والله كأنك صادق فعلا احنا أصحاب الوطنية والشرف والكرامة ولك لد علينا والله ما واحد قادر يعيش بكرامة والصحيح ما شفت واحد من هذول الي بقول عن حالهم وطنيين ابوه أو جده أو ابنه استشهد وعايش مثل الناس حتى هذول أولاد وآباء الشهداء ما شفت واحد منهم مستلم منصب عليه العين ولا حتى ابن فلاح ولا ابن حراث استلم منصب وإذا استلم بتكون غلطه وسرعان ما يتم كحشه ولك ومع كل هالحكي الي حكيته يا فاسد يا عميل احنا الوطنيين لا نزال وسنبقى حماة الوطن ونحن من نقدم الشهداء من خيرة ابنائنا من منتسبي الجيش والمخابرات والأمن والدفاع المدني ولك احنا أصحاب الكرامة وأهلها وإحنا ملح الأرض وأمهاتنا وابائنا هم عنوان الأردن وحملة راية الوطن ونحن باقون ومحافظين ومتمسكين بهويتنا ورح نضل ندافع عن مبادئنا حتى يرث الله الأرض وما عليها أما انتم أيها الفاسدين يكفيكم خزي وعار لكم ولأحفادكم أنكم منبوذين في السماء والأرض ويكفيكم اهانة وحقارة وحينما يكون الحديث عن الرجولة والشرف والكرامة تكون انتم بريئين منها برغم فلوسكم ومناصبكم وبالنهاية اللهم أحفظ الأردن وأحفظ شعبه وأحفظ جيشه وأجهزته من كل سوء وادم اللهم علينا نعمة الأمن والأمان واللهم عليك بالفاسدين والمنافقين أنهم لا يعجزونك .
الفاسد : يا هملالي اوكلوا واشبعوا واشربوا على هالحكي وانتو عليكم اتقدموا الشهداء وتحرثوا الارض واحنا علينا نقطف الثمن خيوه كل كلامك حطه بالخرج انتهت المناظرة .
مصرع 5 وإصابة 33 آخرين بسبب إعصار مدينة قوانجتشو الصينية
