صحيفة السوسنة الأردنية

صباح الخير يا اصدقائي,أحلى واحسن جلسة حوارية حضرتها كانت في باص النقل العام, سائق الباص كان يدير الحوار, والكنترول مدير العلاقات العامة والناطق الرسمي باسم الباص في الجلسة, وطبعا اطراف الجلسة هم مواطنون عاديون من عامة الشعب وهم: عطوان ونشمي وفلاح وعواد, يبدأ عطوان بافتتاح الجلسة ويقول والله ما حدا يدفع اجار الركاب غيري,انه غير يدفع الايجار عن عواد وفلاح ونشمي, وطبعا يمين عطوان تسبب له بصيام ثلاث ايام بعد ان اصر نشمي على دفع الايجار, مدير العلاقات العامة والناطق الرسمي يقول للركاب بانه ما فيه نية لرفع الايجار من القرية للمدينة, رئيس الجلسة الحوارية وهو سائق الباص يقول لا نية في الوقت الحالي لرفع الايجار ولكن بالمستقبل الخيارات مفتوحة بالرفع, عطوان متحمس للكلام ويقول (انتو بدكم تضلو ترفعو فينا هاي السنة), وعواد يضيف على كلام عطوان بجمله تقول(اذا على الرفع مش مشكله), مدير العلاقات العامة في الجلسة وهو الكنترول يقول( يا اخوان رفع الايجار كله لمصلحتكم ومصلحة الباص عشان يقدر يمشي الباص ويشتغل).

فلاح (يفغم)يعني بيوكل بحبة بندورة ويقول( الله يستر من تواليها),سائق الباص يقول( اللي مش عاجبه هالحكي ينزل من الباص وما يطلع فيه),نشمي معصب كثير ويقول( هاي اخرتها بدهم يطردونا من باصنا اللي طول عمرنا نتنقل فيه), الكنترول يقول للركاب(مين نازل على سجن بيرين), ماحدا بيرد من الركاب على مدير العلاقات العامة بالجلسة وهو الكنترول, ويستمر الباص مسيرته نحو النهاية........., اصدقائي مهما حكينا عن وجعنا وعن همومنا ومهما اختلفنا مع بعضنا, أكيد رح نتوصل لحل كل مشاكلنا,ورح نظل اولاد بلد غصبن عن الراضي والزعلان, مش مثل ما حكى عنا أحد المسؤولين أنه أحنا مطاريد في هذا البلد , وكل عام وانتم بخير