صحيفة السوسنة الأردنية

رخصت سيارتي الكيا سيفيا ون وثاني يوم قلت خليني اطش فيها... فعلا رحت على عمان وشوفت حالي واني بعبدون... بس ما عرفت انها عبدون الا بعد ما روحت

المهم وقفّت على الاشارة، كل السيارات اللي حواليّ كلها بتلمع لمع ومكلّها موديل سنتها... لديّت من الشباك كل الناس بتتطلّع فيّ.. قلت طيب مالها الناس، فتحت الاشارة لديت حواليّ ما فيش سيارات كلها بلحظه وانها ماشية، وانا بعدني عالاشارة بشغّل لاني لما وقفت طفيتها مشان اوفر بنزين.. ولما فتحت الاشارة هيت السيارة اتشغّل... لكن الزوامير عليّ من كل الجهات، المهم شغلت السيارة من الموت

وانا ماشي كل السيارات تتجاورز عني ويطلعوا فيّه... كأني مش من الكرة الأرضية وبعضهم يصّيح عليّ بس مش سامعه لانه الباب اليمين بكركع.. وغطى الماتور بيرقص لانه الشنكل مقطوع... بس اعرفت انهم زعلانين وبسبسبوا لاني مش مسرع.

وانا ماشي اجاني تلفون وبدّي اطول التلفون من جيبتي راحت السيارة عاليمين مجنّحه لولا اشوي بكوشلي اكّمن سياره لان السياره بدها ميزان وبتمشي عجنب، المهم طلت التلفون من جيبتي وانها الحرمه اللي بترن.. قلت الها اشوه فيه قالت الجرّة خالصه وبدها جرة غاز ثانيه تكمّل الفطور.. حكيت مع الغاز تاييجيلها المهم ربنا نجّانا من حادث.

وانا ماشي بالسياره ومكّيف ومبسوط على هالمشوار بين هالسيارات الراقيه وحاط شريط غناني يا صبحا هاتي الصينيه لوليد توفيق وانها سيارتي بترطر ودخنت وقفت بنص الشارع.. هون انا اكدّت الموته لانه كل الناس طايره طير.

اتفقد بهالسيارة شو اللي وقفها ما عرفت. المهم واحد مارق بالشارع غلط وقلي بدك مساعده قلتله ول يخوي انا بجيرتك تطلعني من هالمأزق... اجى قال شغّل بلشت طرطرطر وانه بقول عموه هاي بدها بنزين بنزينها خالص... يا ورطة الورطة طحت منها وصرت اشوشح للسيارات الرايحه والجايه تا واحد يوقّف، لاني بدّي قلن اروح اجيب فيه من الكازيه بنزين المهم اجت الشرطه.. ليش موقف هون قلتلهم خالص منها البنزين... دبّرولي قلن وقالوا هاي الكازيه ورا... واجيك طاير بالشارع اركض وانا لابس شوره حمراء وظليت عاظ عليها لا تطير عن راسي وما اوصلت الكازيه غير نفسي مقطوع... المهم عبيت بنيرا ورجعت وانه الناس اللي متجمعه عند السياره تقول فيه عرس، وانا بركض وكلهم بيطلعوا فيّه تاوصلت... سحبت غطى البانزين لانه مربوط بخيط لانه بشلّف مرات وبسقط عالارض.

حطيت لتر البانزين وهيت وهيت شغّل... قال الشرطي هاي ماخذه وسخ ادعس ما فيش فايده.. وهيت عشّق بين هالازمه قامت شغّلت تا ملصت وطلعت من هالورطة
لكن توبه ما عمري بيركبك يا هالكيا.. عزاره وعليها شهود.
روحت عالدار لكن طقّني عخشمي بتطلع روحي.
وسلامتكوا