صحيفة السوسنة الأردنية

اسكتو اليوم بدي احكيلكم سولافة زي سوالف ايام زمان لما كانو الختيارية يتعللو حوالي المنقل أو بعديها بشوي لما صار عندهم صوبة ديزل أو بعدها بشوي على أيام صوبة علاء الدين والفوجيكا، بس مش هالايام في صوبات غاز ومكيفات وصوبات كهرباء، هاي السلاوفة بتزبطش مع هذول الناس.
قال ايش بقولك الحكومة اطلقت بالون اختبار، أني فكرت أنهم بدهم يعلمو تجارب علمية والا اشي من هالنوع أو على الطقس عشان يشوفو ليش الدنيا بطلت تشتي زي زمان، والا علشان يطلعو عالفضاء والامش عارف ايش ما هي السولاف اللي بنسمعها بالاخبار، الا وطلعت يا طويلين العمر سولافة انهم بدهم يصيروا يعطلو الموظفين ثلتيام يعني بالفصحى( العطلة الأسبوعية ثلاثة أيام بدل يومين، من الجمعة وحتى مساء الأحد). الصحيح إنها مش فارقة كثير إن شاء بعطلوا من الأثنين للخميس، مهمو بقولو مرات هذه العطلة إنهم بدهم يطوروا الإدارة العامة وإن الموظفين ابشتغلوش غير بيجي ساعة ونص باليوم، يعني لو حسبناها مليح بتلاقي الموظف الساعة اللي بقضيها بالوظيفة يشرب شاي وقهوة ويسولف بتطلع ابصر قديش بس أكيد غالية، طبعاً مهما موظفين حكومة كيف لعاد.
يعني لدلك هسه الحكومة خلصت وحلت كل المشاكل والأزمات اللي بأردن وما ظل غير يزيدوا العطلة، أه حرام الموظفين تعبانين من الشغل، وكأن العمل الحكومي مرهق، أه والله بجوز. ما احنا شايفين مساكين مقطعين حالهم من كثر الشغل.
طيب يا عمي هنيالهم هالموظفين بوخذو رواتب وزيادات ومكافات وسفريات وتأمين صحي ومقاعد في الجامعات وغيرها وبالاخير بقلك بقلك أيش انهم بشتغلوش. طيب أمنا بهالكلام. طيب ليش يا اخي اذا ما بشتغلوش بدك تكافئهم وتعطلهم كمان يوم وبنفس رواتبهم، والله هاي دحه على رأي مرزوق ها وكيف لعاد خليهم ينبسطوا.
بتعرفوا أحسن اشي بالدنيا وظيفة حكومية، بتشتغل على راحتك والمواطن اللي بدفع راتبك وكمان بترجاك تمشيلوه معاملته كانك انت اللي بتعطيه مصاري مش هو، طبعا هي اخر الدنيا لانه انقلبت الأية.
طيب هسه بنيجي لهذول اللي متشجعين للعطلة مين هم وليش مكيفين عليها كثير، طيب وشو رح يستفيد المواطن من هالعطلة، أي احنا ما بنصدق الولاد يروجوا على المدارس عشان نريح روسنا من دوشتهم وطلباهتم، أي مستكثرين علينا نرتح شوي.
وبعدين عشان يزبطوا الموضوع بقولك أه المواطن رح يستفيد بدل ما يضل يراجع الدوائر الحكومية برتاح ثلتيام من الرووحه والجايية، وممكن الحكومة تخفضلو رسوم المعاملات، وممكن توفر على الموازنة عشان بدهم يطفو اللمبات اللي بالدوائر الحكومية، طيب يا زمة ما يوفروا بالسيارات والبنزين والسواقين والأمن اللي مع المسؤولين، والا السيارات الحكومية اللي بروحو بيها على المناسبات الشخصية وبودو الاولاد على المدارس وبروحو بجيبوا بيها خضرة وبشموا الهوا بيها ما بدهاش توفير، أه ولا تنسى المدام اللي بتشخص بيها قدام الجيران وقدام قرايبها، ولا البلديات وهذول البنات اللي بسوقن بيكمات بانصاص الليالي قال ايش قال شغل. طيب ما هي الحكومة بتقول عنكم انكم ما بتشتغلو غير ساعتين زمن بالنهار ولويش هاي السيارات دايرة بالشوارع لعاد.
اقولكم يعني الحكومة حلت مشكلة البطالة والنمو الاقتصادي والترهل الاداري والفساد وسددت المديونية وزبطت مناهج الاولاد بالمدارس وزبطت الشوارع وردمت الجور والحفر اللي ملزقة بعجال السيارات وزبطت الزراعة وحلت مشاكل المزراعين وبطلت الحسبة والاسواق المركزية توكل حق المزارعين ويضحكو عليهم السماسرة اللي اصلا كثير منهم مش من هون.
وما ضلش مشكلة بالمستشفيات ولا المراكز الصحية وحلت مشاكل المرضى اللي مساكين الله يكون بعونهم، لا لا بس الصحيح والله وزير الصحة أنه نشمي، يزم سمعنا عالتلفزيون بحكي حكي مرتب لا ما هو الصحيح احنا ما من قلل من قيمة الناس الكويسة واللي بتشتغل.
لا وسولفة الضمان هاي لحالها بدها تعليلة وقهوة وشاي ونظل نهيجن للصبح، بس اقولكم الحمد لله انه الواحد اخذ تقعده والا كان راحت علينا على سولافتهم.
بس شو بده يقول الواحد،
اه صحيح وقبل ما انسى، بدي اقولكم اشي، الصحيح أنه الحكومة مبدعة ومبتكرة مش انتو بدكو هيHك هاي عملتكم ابداع وفكرت خارج الصندوق اللي داوشينه بيه فكروا خارج الصندوق فكروا خارج الصندوق، هيهم فكروا وطلعونا بهالفكرة الجهنمية.
لا وبقولك هاي بتزيد التفاعل الاجتماعي، وبتزيد مستوى التعليم عشان الاولاد والقواريط بتعلمو وهمه بالدار على الكمبوتر، اللي طول النهار فاتحينوه وبتفرجو على المسخرة واشي احنا ما بنعرفه ولا بندري عنه، لا وقال كانهم اصلا بيقروا وهمه بالمدرسة، ترى حارتنا ضيقة وعارفين بعضنا بدناش نضحك على بعض، لا لا بس الحكومة أكيد ما بتضحكش علينا. لا بقولك كمان قال بتزيد البحث العلمي للدكاترة اللي بقروا بالجامعات، اه مهموه مقطعين حالهم بالبحوث والدراسات اللي من هالنوع الي جابولنا فيها مشروع نعطل ثلاثة ايام.
لا واللي بضحك بقولك قال بتزيد السياحة الداخلية، بتعرفوا لما اسمعتها متت من الضحك، قال ايش بتزيد السياحة الداخلية قال، اي ما هو الناس مش لاقية توكل وانتو بتقولو بتزيد السياحة الداخليةـ شلون، لا وكمان بتقول أن بدنا نعطلكو عشان نخفف عليكم البنزين لما بترحوا فيه عالدوام، طيب كيف صارت هاي بدكو تخلونا سواح ونفس الاشي بتوفرو علينا ثمن البنزين اللي بنروح بيه عالدوام، اه فهمت قصدكو انت البنزينات اللي بدل ما يروحو بيهن عالشغل يروحو بيهن سياحة، أه والله فكرة جهنمية، بس مين بده يعطينا حق اللحمة والسلطة والمشروبات لا يروح فكركو لبعيد انا بعرف في ناس ذمتها واسعة قصدي المشروبات الغازية لانه هضيك اصلا حرام وما بنقدر نشتربها.
بس اقولك يا حكومة، دورولكو سولافة غير هالسولافة، مش لأنه شركة بجزر الواق واق أو حتى بلد في القطب المتجمد السايح الشرقي غربي جربو هالسولافة نروح احنا نعطل البلد كلها. لا لا قبل ما نفكر بالسولافة نشوف هضولاك لويش عمله هالسولافة، واحنا عنا قروش قدهم، وصناديق مخبينها للزمن ولولادهم زينا، أه واللا احنا مخبينلهم ديون على قلبهم مساكين الله يكون بعونهم قد ما بدهم يسدو من هالديون اللي كل سنة بتزيد وكل حكومة بتيجي بتقولك هاي من الحكومة اللي قبلي، وضاعت الطاسة وبطلنا نعرف من اللي ورطنا بهالديون مهي طاسة ضايعة أو خلينا نقولها بالفصحة يتفرق دمه بين القبائل وما بنعرف مين أول واحد ورطنا بهالديون، وما بنقدر نحمل حدا مسؤولية الكل بقولك مش على دوري، واحنا مساكين مصدقينهم ما هو طالعينا كل يوم على هالاخبار بهالتلفزيون وبسولفو واحنا مساكين منصدقهم، ولا وازيدكم من الشعر بيت ، احنا ما كنا ملحقين عالتلفزيونات هسه طلعونا باشي اسمه البوكاست أني ما بعرف شو هو بس الاولاد بقلولي يعني زي مقالات التلفزيون بس هذا اشي حديث وتكلنلوجيا انت ما بتعرف انت بغدك قديم، المهم وكل واحد بمن هالمسؤولين بقعد يحكHي بطولاته واحنا هبايل مصدقينهم ومش عارفين مين اللي وصلنا لهون.
أقولكو لهون وبكفي، احسن اشي عشان ما حد يقول أنه سولافنا بهالسولافة، نعمل زي زمان، عمو انت مع مين جاي، يا ناس يا عالم في عيل ضايع هونا حدا بعرفو والا بعرفو اهله، روح روح عمو الله معك.
قال ايش عطلة ثلتيام قال، بدل ما يقللو العطلة وشغلو الناس اكثر عشان يزبطولنا الوضع الاقتصادي وزي معنا قروش قال بدهم يزيدو العطلة، لايا عمي هاي دلع لموظفي الحكومة وما منها فايدة،،،


مدرب ومستشار تنمية إدارية وتطوير إداري