صحيفة السوسنة الأردنية

حوار مجتمعي كبير حول زيادة أسعار المحروقات للشهر الثالث على التوالي، فقد تم زيادة أسعار المحروقات بواقع عشرة فلسات (قرش واحد) لشهر أذار للتر البنزين 90، ثم زيادة تسعين فلساً (تسعة قروش) لشهر أبريل، تلاها زيادة تسعين فلساً (تسعة قروش) لشهر أيار، أي زيادة مائة وتسعين فلساً (تسعة عشر قرش) للثلاثة أشهر الأخيرة ليصل سعر لتر البنزين 90 إلى دينار أردني، ويعد هذا السعر هو الأعلى في الدول العربية التي منها أفقر من الأردن وتعاني أزمات اقتصادية وحروب وغيرها ومع ذلك تجد أسعار المحروقات فيها أقل منها في الأردن.
مما شكلت هذه الزيادات الكبيرة عبئاً كبير اًعلى عاتق المواطن الأردني.
كما يعلم الجميع بأن موضوع الطاقة من المواضيع المعقدة جداً تتداخل بها عوامل كثيرة، وأن أسعار المحروقات عصب الحياة الاقتصادية في جميع دول العالم ولها انعكاسات اجتماعية كبيرة على حياة المواطن باعتبار أن أسعار المحروقات هي رأس القاطرة التي تجر ورائها أسعار باقي السلع والخدمات التي تتأثر بهذا الارتفاع.
لقد استكثر المواطن الأردني هذه الإرتفاعات على سعر المحروقات، لماذا ؟؟؟.
والإجابة على لسان حال المواطن الأردني وبلهجته المحلية وكاأنه حوار بين شخصين.
شو يعني زيادة تسعة قروش، له له له ليش الناس مستكثريتهم يا زم كلهم تسعة قروش مش اشي عظيم يعني. يا زمه بالله عليك اسكت أي هي لو وقفت عالتسع قروش والله ما بتفرق معنا بس يا عمي أحسب معي اللي عنده سيارة بنزين بصير أفكر مليون مرة قبل ما يستخدمها علشان ما يصرف بنزين، وثاني أشي بدهم يرفعوا أجور النقل يعني زياده على المصروف، بالله تسكت يا زم هي وقفت على أكم قرش، لا يا عمي ما وقفت على أكم قرش بس قديش بدهن يزيدن علي وعلى الاولاد اللي رايحين جايين على المدارس والجامعات واللي بروحوا على شغلهم بمواصلات النقل العام، يعني زياده بمصروفهم اليومي. طيب وشو يعني مش كثير، ولك يا عمي طول روحك علي، مهو يعني بلحق هالزيادة رفع أسعار السندويشات والشاي والقهوة والعصائر اللي بشتروهن بالمدرسة والجامعة وبالشغل. طيب وشو يعني مش كثير !!!، بالله عليك تسكت، هاي بس مصروفات للاولاد، طيب يعني مش رح ترتفع كل حاجات ومتطلبات البيت من خضار وفواكه لا ما فيش فواكه كل راسمالها بطيخة بالاسبوع وباقي الأيام كم طير جاج اللي صرنا نكاكي منه. أما اللحمة هاي سولافة كبيرة وبالمناسبات بس بعد ما صار كيلو اللحم الروماني أكثر من عشر نيرات وإذا قدرنا نجيبها أما اللحم البلدي هاظ بالاحلام، أما اذا تورطنا بعزيمة الله وكيلك هاي سولفة ثانية وبصير عنا عجز بالمصروف الشهري زي عجز الحكومة وبنصير نرحلة من حكومة لحكومة قصدي من شهر لشهر، أو بنصير ندين من هون وهون ونلبس طواقي.
ولا تنسى كمان المواد التموينية وكل اشي آله علاقة بالأكل، كما يا أبن الحلال رفع سعر قارورة المي، ها ولا تنسى وكمان بده يلحقهم كل المنظفات الكيماوية اقولك هذول مصروف بهلك لحالهن والله الواحد ما هو ملحق محارم للبيت والحمام والمطبخ وهاظ كمان اللي بشترونه النسوان المحارم اللي فيهن مي معطرة ابعرفش شو اسمة بش بنشوف النسوان بسحبن منه وبتظل تمسح بيهن ايديها وبعدين بتمسح شنتتها والطوالة واخر اشي بس تخلص بتمسح بيهن الكندرة.
يآ ابن الحلال هي لو زيادة بس ما في مشكلة بس هاي زي القاطرة اللي بجر وراها كل أشي يعني إذا زادت المحروقات كل اشي بزيد. ولما تسأل التجار بصير اقلك ما هو ارتفعت المحروقات واحنا بنستورد كل اشي بالبواخر والطيارات وسيارات الشحن. طبعاً واحنا ما جبنا سيرة باقي الأشياء الأخرى من ملابس وغيرها.
ولما تسأل التاجر عن الأسعار بحطلك ألف سبب وسبب وبصير محلل سياسي واقتصادي وبقلك يآ ابن الحلال ما أنت شايف الحرب على إيران كل اشي ارتفعت اسعاره، وبتسال التاجر ليش بقلك ما هم سكروا مضيق هرمز وبتقله يا زمه شو دخل مضيق هرمز بنكاشات الأسنان اللي جايات من الصين اي هن انحشرن بحلق هرمز والا جبنة البقرة مربوطة وبترعى على المضيق.
يازمه انت مش عايش بالبلد، يعني الله قالها خلال شهرين يزيد البنزين ثمانتعشر قرش ما هو طبعا هذا اللي ماسك راس الخيط وبجر وراه كل اشي.
احنا مش معترضين يرفعو ما هو كل العالم رفع سعر المحروقات واحنا عارفين انه الحكومة بدور على مصلحتنا أكثر منا بس احنا بنقول يعني لو هالحكومة تنزل شوي من الضريبة الموحدة بتساعدنا شوي والا بس احنا اللي ندفع خليها تدفع معانا شوي والا هي ما الها دخل.
لا واسمع الناس شو بتقول يا زم هذول اللي بقررو يرفعو البنزين همه راكبين سيارات على حساب الدولة وبروحو وبيجو بسيارات الحكومة  اللي  بعبوهن بنزين من الضريبة الموحدة اللي انت دافعها وبدفعوش بنزين لا بيجي واحد بقلك كمان بعطوهم بدل تنقلات. اقولك احنا عارفين بس تخلص هالميمعة بتاعت الحرب أكيد الحكومة بترجع كل اشي ارخص من اول بس اصبرو شوي فالقادم أجمل.
نعم القادم أجمل بس تحملوا فالفقراء يدخلون الجنة وإن الله مع الصابرين ولا حول ولا قوة إلا بالله العلي العظيم.
لسان حال مواطن مسخم.