صحيفة السوسنة الأردنية

​لما نحكي عن الأردن، ما بنحكي بس عن مساحة على الخارطة ولا عن أرقام بجغرافيا. الأردن أكبر بكثير من حدود جغرافية انعدّت بـ "الكيلومتر المربع"! الأردن مواقف، والأردن رجال، والأردن تاريخ انكتب بالدم والنخوة والمبادئ المترسخة.
​مثل ما قال سيدنا الملك عبدالله الثاني: "العالم بيعرفوا من تاريخنا... دولة صغيرة بس قد حالنا، لكن على الخارطة نحن أكبر من حدودنا".
​هاي الكلمات مش مجرد جملة عابرة، هاي اختصار للهوية الأردنية الشامخة. الأردني دغري، سيده وسيد غيره في الصدق والمواقف الصريحة. الأردني ما بيلف ولا بيدور، ولا بيكذب، وإذا أعطى "كلمة"... خلاص! الكلمة عندنا عقد، والوعد عندنا دين بنموت ودونه ما بنخون. هاي المدرسة اللي تعلمنا فيها، من أيام الراحل العظيم جلالة الملك الحسين بن طلال -الله يرحمه-، وهي السياسة والنهج اللي شربناه مع المية وشهامة التراب.
​اللي مش فاهم الأردن، يقرأ تاريخه صح!
الأردن وقت الرخاء حليم وصبور ومستقبل للكل، لكن وقت الضغط والشدة؟ "ما في أقوى من الأردن!"
كل ما اشتد الضغط على هذا البلد، كل ما صلب عوده، وكل ما ظهر المعدن الحقيقي للرجال. التاريخ يشهد، وكل معركة خاضها الأردن تثبت إنه لو كنا أحياناً أصغر دولة بالمنطقة، بنكون الأكبر أثراً، والأشرس دفاعاً عن حقنا وأمتنا، والأثبت في وجه الرياح والغيوم السوداء.
​اليوم، والتحديات العاصفة بتمس حدودنا وإقليمنا، ما في خوف أبداً. ليش؟
لأن القيادة والمواطن على قلب واحد. المسؤول بيحكي والمواطن بيفهم، لأن المواطن الأردني واعي، ومجرب، وعارف شو يعني وطن، وشو يعني حماية أرض. الأردني بيفهم بالمواقف ومش بحاجة لشرح، تاريخه بالحروب والتضحيات بيحكي عنه وعن رجولته.
​خليهم يعرفوا ويميزوا: الأردن قد ما ضغطت عليه الظروف، ما بينكسر. بضل مرفوع الرأس، كبير بمواقفه، عصي على كل تحدي، ودغري بيمشي بالحق وما بيهاب!
​حمى الله الأردن، وشعبه العظيم، وقيادته الهاشمية المظفرة!