صحيفة السوسنة الأردنية

أبو عناد و حماته و زوجته واولاده  الأربعة  عايشين بغرفة واحدة ..بظرف ولا ازفت من هيك...ابو عناد مش طايق العيشه ..مخلاش حدا الا شكى له...

استشار ابو فهمي ..ابن القريه المتفلسف  اللي  بيفهم بكل ايشي..

** الحقني يا ابو فهمي شو اسوي بوضعي  و بهالعيشه اللي خانقتني..

*** اسمع يا ابو عناد ...روح شوفلك  حمار قبرصي و حطه معاكو بالغرفه...عملها على طول ابو عناد مهو متعلق بقشه...

و ثاني يوم هرول لابو فهمي يصيح و ينيح.... ... ما قدرنا ننام من الحمار يا ابو فهمي. خربت بيتي زياده. ...

ابو فهمي نهر فيه و قله اصبر يا زلمه و رد علي... روح استعير  معزه جارك الشاميه  و حطها بالغرفه عندك و اتوكل على الله....

و الله لا يفرجيك. ابو عناد ما قدر يتحمل حمار و معزه بنفس الغرفه مع العيله.....زحف على ابو فهمي ...يا ابو فهمي الامور ازفت و لا قادر اتحمل لا انا و لا اهل البيت..

*** ابو عناد ما ضل الا تروح تشحذ عشر جاجات  من جارك و تحطهم معاك بالغرفه و انشاء الله محلوله ..

ابو عناد زهق من ابو فهمي و من حلوله  ... و قابله صدفه قدام البيت....

كيف الامور صارت يا ابو عناد ....

*** و الله يا ابو فهمي -يا من شراله من ماله عله-  اسؤا من هيك ما في رح انتحر ...

*** ماشي روح هسه رجع الجاجات  و تعال بكره ...ثاني يوم طل ابو عناد و بعض علامات الارتياح على وجهه....و الله يا ابو فهمي الامور احسن شوي..

*** خلص روح هسه رجع المعزة و تعال بكره .. ابو عناد اجاه في اليوم التالي و هو فرح و مرتاح اكثر .. الامور اريح شوي و احسن يا ابو فهمي..

*** خلص يا ابو عناد روح بيع الحمار و شوف كيف الامور بتصيير .. باع ابو عناد الحمار  و هرول الى  ابو فهمي ...

*** شكرا يا ابو فهمي....هسه انا مرتاح و قادر اعيش....  احسن من هيك ما في.  كنا وين و صرنا وين ......

اخ اخ ..... طيب انا شو بدي احكي  بعد ابو عناد ....حملوه  شوال  قال  ثقيل ...حملوه  اثنين صاح  و ولعت معه ...شالو  شوال. حمد ربه و قال ايوه هيك الواحد  بيقدر يحمل...يعني لما شاف الموت رضي بالسخونه ....

بتشكي من ضريبة مبيعات ١٢٪.   يعني شو رايك ب ٢٥٪ ... هسه صارت ١٦٪ دحه و فرحان فيها....

البنزين مش عاجبك  بخمسين طيب بليره احسن. و لما صار ب٨٥. حضرتك فرحان و بتحمد ربك على النعمة....

رفع سعر الخبز.... طيب بلاش نرفع ....رفع الكهرباء....طيب بلاش رفع خليها نص رفع....ضريبه خروج  بدل ما تصير كمان ضريبة دخول....اي بعدك بتدفع ضريبة تلفزيون و ما حدا بيطلع عليه مع كل هالقنوات  الفضائيه.....

ماشي هسه ما عندك شغل و بترقص بين خط الفقر و خط الجوع ....  ارضى  بهيك لتغطس تحتهم الاثنين ....

رفع....تنزيل.....اي احمد ربك عللي عندك و سد ثمك و اسكت او اخرس....المرجيحه  شغاله مع المروحه...واذا بدك عندنا سيسو. ...

ما ظل الا المختار يصرف مصاصة  ولا لهايه  لكل واحد حتى لا يتضايق و يحكي و يرضى.....