صحيفة السوسنة الأردنية

حكمت محمود البشير

من المتعارف عليه بأن المنسف الأردني من الأكلات الشعبية المشهورة على المستويين المحلي والعالمي لكن إذا كانت هناك مزيدا من الإشاعات التي تتداولها المحطات الفضائية بشأن أنفلونزا الماعز حيث أن المنسف يعتمد على اللحوم البلدية وعلى مشتقاتها وخلينا نشوف هالموقف اللي صار مع محبي المنسف ؛

أبو مالك وأبو مروان وأبو خلدون وأبو علاء (مجموعة من الطباخين المهرة للمنسف الأردني وبالشهادة المحلية )

الجميع يتوجهون إلى ديوان أبو حمدان ----- وبديوان أبو حمدان بحلى الكلام ---- خير عسى ما بيه شر ؟

أبو حمدان : هدوا شويه مش قادر أفهم ----- لويش بتسولفوا مع بعض – واحد واحد خليني أفهم شو بيه؟

أبو مالك : هاظا يا أبو حمدان بيقولوا إنه رايح يبطل الإقبال على المنسف – يا ويلي –يا خراب بيتي!

أبو خلدون : لأه ومش بس هيك كمان بيقولوا بيه أنفلونزا اسمها أنفلونزا الماعز كمان –يا ربي دخيلك!؟

أبو علاء : ما انتو بتعرفوا إنه المنسف بعتمد على المشتقات الحيوانية من اللبن والجميد والسمنة البلدية واللحمة كمان، ها ولا لعاد شوهوه المنسف --- والله غير أصير أكش بالذبان إذا هالحكي صحيح كمان؛

أبو حمدان : خلصتوا الحكي اللي عندكوا --- هات يابه يا حمدان الدله والفنجان خليهم يبلوا ريقهم من الصدمة الظاهر إنه فعلا هاظا إحنا بسرعة بنصدق كل إشي بنسمعه --- توكلوا على الله اللي سمعتوه مابيه إشي من الصحة ،والخبر ما صدر عنا من وزارة الصحة أبس أنا سمعت إنه هاظا المرض موجود بس ببعض الدول وحكومتنا حريصة من هايه الناحية لا بتودي ولا بتجيب من هذيك البلاد غنم، وبعدين أي إنتوا ناسيين إنه الله منعم ومفضل علينا بثروة حيوانية من الأغنام والخرفان وبدليل إنه بعيد الأضحى الأردن كانت من البلدان المصدرة للأغنام؛ ما غير لا غنى عنه منسفنا الأردني.

أنا ما بستغني عن المنسف شو رأيك ولو ما ظل حدا بالدنيا بوكل منسف غير أظل أنسف ولا برد على هاية السوالف

أبو مالك : فعلا إنك يا أبو حمدان طمنتني تراني هكلت الهم وصابني الغم أبس فعلا زي ما قلت لا غنى عنه المنسف الأردني ؛ هوه اللي بحلي سفرتنا ومناسباتنا ولا تنسو إنه أصبح أكله مشهورة عالميا لو إنك بأي دوله وبتقول المنسف على طول بقولولك إنته أردني والنعم من المنسف أكله ؟؟

أبو خلدون : المنسف هو أكلتنا الشعبية بأفراحنا وبنجاحاتنا وبأتراحنا وبمناسباتنا المختلفة وهوه أكله غنية بكل ما تعنيه الكلمة من الغذاء الكامل (كثرة الدهون و الكوليسترول المشهور بيه الشعب الاردني و الله يعطينا الصحه و العافيه ، مع ذلك بدنا نوكل المنسف ) .

أبو مروان : هون وحول عن راس الحصان خيوه –ولا تنسى إنه إذا بنا نوكله كل يوم شو رايح يصير معانا ما هريني قدامك صابني ارتفاع بالضغط من الجميد واللبن اللي بذوقه كل يوم لما بطبخ بالمحل أي بس الذواقة لحالها على يدك تعال وعد وشوف – وكمان صار معاية دهنيات – عمني ما بتعامل غير بالهبرة من اللحمة البلدية !

وكمان صار عندي كوليسترول والحمد لله السكري هاظا من أول ما اشتغلت بالطبخ والنفخ أبس لو مية ضغط ومية ارتفاع بالدهنيات والسكري ولو كان بيه أكثر من هيك أنا ما بقدر أقاوم المنسف يا إخوان ؟؟

أبو حمدان : والله وأنا كمان هذيك المرة رحنا على مناسبة بالسلط وصاروا بدهم يطبقوا وثيقة السلط الشعبية اللي بيقولوا بيها إنه لازم نقسم المنسف بصحون أبس يا إخوان لا حدا صد ولا حدا رد الكل ضد تقسيم المنسف بصحون ولا كيف اسمه منسف لازم ننسف السدر ها كيف لعاد؟ بدكوا بصراحة ما تقنعوني المنسف إله أعداء كثار وخاصة إذا كان بالسمنة البلقاوية واللحمة البلدية والجميد الكركي والحواجة الجبلية أي هوه بيه أستشى من المنسف لما الواحد يقعد ينسف والباقي تشرب عليك بالشراب( شهيتوني)

– أبو مالك : إلك بكره أحلى منسف بالمحتويات اللي ذكرتهن وفوق هيك بالصنوبر واللوز والشراك اللي بتخبزه المره، ولا يهمك وعلى قلبك صحة وعافية ترى يا إخوان زمان قالوا أجدادنا مثل مفاده إنه النار بتكتل سم الحية ما بالك بعطسة غنمه ولا خروف ما ترودوا على هايه الإشاعات هايه قنوات فضائية كذبيه بدها تسويلها طنه ورنه لأنه ما حدا بطل يطلع عليها، وبعدين بتذكروا لما صاروا يقولوا إنه بيه حمى مالطيه هذيك الأيام بطل للمنسف سوق؛ بالعكس الناس انشرهت عالمنسف --- كيف بنا نسوي كروش --- أحزروا ----

فعلا المنسف أكله مشهورة كثير بالأردن وخارج الأردن وصار مش الأردني بوكل المنسف روح وشوف كيف أكلة المنسف صارت بالبلاد المجاورة من الأطباق الرئيسية حتى أشقائنا اللي بزوروا الأردن بيوكلوا المنسف الأردني ولا ننسى كمان إنه حتى إخواننا المصريين صاروا يوكلوا المنسف ؛ولا ننسى أن الإكثار من الشيء ينقلب إلى ضده وأن هناك دراسة أجريت حول مرض السكري في الأردن بحيث تعتبر رابع دوله عربية فيها مرض السكري بين الكبار والصغار بنسب عاليه هذا مما يجعلنا أن نكون حريصين على إعادة اختيارنا لغذاءنا ،و المنسف اللي بذوقه مره برجعله مية مرة ونتمنى دايما لشعبنا الصحة والعافية وصحتين وعافية وفعلا المنسف لا غنى عنه ------وإلى اللقاء مع يوميات ابو حمدان -------- بس وين ؟؟؟؟

Hikmat_b@yahoo.com