صحيفة السوسنة الأردنية

عندما نرى النور القادم من بعيد على يد البقية الباقية ممن يحافظون على امن الوطن وماله وترابه نفرح ونقول( هانت الله يقويكم ويقوي عصاتكم على كل خاين باع الوطن) ولكننا مع كل اسف لا نكاد نفرح حتى يتم وأد فرحتنا بمجلس يسمى مجلس الامه ومجلس الشعب وصوت الحق وصوت المواطن المقهور الذي انتخب نواب ليصدحوا بمنبر اصبح منبرا لتزييف الحقائق وحماية اللصوص وتزوير التاريخ وغيره الكثير الكثير.

 سعادة النائب الشقران والله لو علموا ثمن دموعك التي ذرفتها على امل تم قتله وحق اغتصب من قبل حثالة الا عضوا اصابعم ندما على ما سيلاقونه مستقبلا. واقول لك لا تحزن عندما تستمني العاهرات على بساط اصحاب الملايين ( والعاهرات هنا اصحاب الساسية الزائفة) ليكون الثمن قوت الشعب وتراب الوطن. 

لا يجدي نفعا ان تحدثنا عن ابناء الليموزين وغيرهم فقد مات الوطن بيد من يجب ان يكونوا حماة للوطن وهنا اسمحوا لي اخوتي القراء والمعلقين وصحيفة السوسنة الغراء راجيا كل الرجاء نشر مقالي دون حذف او تعديل ان اقول الى سيدي ومولاي صاحب الجلالة عبدالله الثاني بن الحسين سيدي: نحن امة اعزنا الله بالاسلام اولا ونبينا محمدا ثانيا ثم كرامتنا ورفعة شأننا و ولائنا المنقطع النظير لسليل الدوحة الهاشمية وال بيته الكرام .

مولاي اسمح لي أن انقل اليك حديثا جرى بيني وبين والدي ونحن نطالع اخبار الوطن ونستذكر ماضي الاردن الذي نعشقه عبر القصص والروايات التي سردها علينا والدي وعمي ورحمة جدي...... :

  يابا صحيح انت خدمتك بالجيش عشرين سنه وشاركت بمعركة ال 67؟ وخدمت بكل مكان بالوطن وكان راتبك (ليرتين؟) وعمي شهيد بكرامة ال67 كرامة كل الاردنين اللي كان فيها الملك حسين الله يرحمو بينكم ويمشي ويتفقد العسكر؟؟؟ وجدي الله يرحمه بنا خط الحجاز من معان لعمان بالتراب والحجر ورصفوا طريقه بعرقهم وتعبهم وعافيتهم وكان مع الفرسان ايام الملك عبدالله الاول الله يرحمه؟ صحيح ايامها الوطن كان بخير؟ وكانت الليره تشتري فيها خبز ولحم ودجاج وزيت وسكر وسمن وعنز وعلف وتوفر منها اخر الشهر؟ وصحيح انك اشتريت الارض تبعت الدار اللي احنا فيها من راتبك؟ وكمان اشتريت الارض اللي فيها دار جارنا ابوجهاد لما اجوا من الضفه وما كان معهم يسكنوا واعطيتهم الارض وبنوا فيها لما الله فرجها عليهم وسدوك حقها؟؟ طيب يابوي شو اللي صار ، الاردن كبر وخيره كثر وتراب معان صار تبر من ذهب "الفوسفات" وجارة الرويشد والازرق صار مثل ما بيقولوا زيت صخري بيكفي الاردن لمية سنه قدام؟؟ طيب يابا ملكنا هو ملكنا وحبنا اله هو نفس الحب اللي كان لابوه وجده وهو كمان يابا نفس الشي حبه لشعبه ما بدو شهاده والكل بيعرفه وبيشهدله بعطفه وحبه وحنيته وتسامحه يابا سامح اللي غلط بحقه وعفى عنه ومش غريبه عليه لانه رحمة ابوه كان رحيم بشعبه كافل اليتيم وجده كمان ما خان ولا باع وطن ولما شافوه اشرف منهم ذبحوه على باب المسجد الاقصى طيب يابا شو اللي صار؟؟؟؟ 

يابا يا بوحسين انت عارف انه في ناس هسا عايشين بحسك؟ وصوتك ونفسك بالدنيا ولما نحكيلهم في ناس سرقوا البلد بيردوا علينا وبيقولوا امشو اطلعوا بره الاردن بخير وطول عمرها بخير ( مع العلم انهم عايشين في بيت شعر وكازهم زبل الغنم واكلهم كراديش الذره بدل الخبز والصبح طرقوع لبن ) ..... معلش اتحملوني بكتب بالعاميه عشان انا من العامه ما ركبت ليموزين ولا عندي قصر ب 12 مليون دينار كل اللي عندي عباره عن خربوش وشوية غنم وحيشى السامعين حمار اركب عليه اكله شوية عشب واذا الله يسرها بيكون بخير ونعمه اذا اكل شوية علف مع الغنم. 

بس بعدني بخير وشبعان انا وابوي وامي واخواني ورغيف الخبز لو قسمناه بينا بيكفي واذا في لحم نعمه واذا مافيه خير وزين العدس موجود واذا انقطع العدس والخبز والمي والخير كله بنضل عايشين ونقول يحيى الوطن وبنصيح بيها بصوت عالي وبنقول عاشت بلادي وعاش ابو حسين حتى لو ما في ملايين وما في قصور وعلالي بنضل نقول تعيش يا اردن وتعمر ديارك والخير موجود واخرته يرجع.... طولت عليكم سامحوني ومع هيك بنادي وبقول مولاي ابوحسين احنا شعبك وبنحبك وروحنا فداك بس وين حقنا اللي سرقوه خون الوطن ؟؟ 

وين راح يا مولاي ما النا غيرك بعد ربنا يرجعلنا ياه شعبك طيب ومسكين وصاحب كرامه بس يا سيدي اذا ضاقت بيه الدنيا وين يروح وراعي الهدله بينا؟؟؟؟؟ بنحبك والله وبنفديك برواحنا بس احنى داخلين عليك يا ابو الاردنين كلهم بدنا حقنا من الخون ,بدنا حقنا يا مولاي ,بدنا حقنا يا حبيب الاردنين كلهم تسلم وتعيش ويمد بعمرك مولاي وربي يحمي الاردن والاردنين الشرفاء ويضلوا تاج وطود عالي تتكسر رقبة كل الخون اللي بيحاولوا يرفعوا روسهم عشان يشوفوا قمته وسامحوني .