صحيفة السوسنة الأردنية

 

   بدايةً أخي المتسابق الوزير ، يا ريت تنسى إنّك وزير ، ومن الأفضل توخذ إجازة لمدّة إسبوع، ما في داعي للكشخة ( البدلة والسيارة ) ، وإذا بتحب أعطيك عنوان أكم سوق بالة ، ماركات من الآخر ، ويا ريت تستاجر شقّة في أحد زواريب الزرقا ، أو أحد أحياء عمان الشعبيّة .

 

   الأكيد إنّك لازم تستغني عن الحرس والخدم ، ولا بدّ لك من إشراك زوجتك وأولادك بهذه المغامرة  ... وفي أوّل يوم من المغامرة ... ستبدأ مشوارك إلى عملك كموظّف في أحد الدوائر الحكوميّة... نزلت من الشقّة الصبح وبلّشت تلاخم مع المواصلات ... مش مشكلة لو ضربتك الشّمس وإنتا بتستنّى ، هو حال أغلب مواطني  الأردن ، وأخيراً وصلت للدائرة ... المدير طالع نازل يبهدل ، كمان مش مشكلة ، إتذّكر حالك لمّا كنت وزير ، إيش كنت تساوي بالموظّفين ، و المراجعين رفعولك ظغطك ..!! مش مشكلة  عيش بهدلة الموظّفين ، وإتذّكر إنّك مريّح حالك في مكتبك لمّا كنت وزير ، وبدّك تمشّي معامتلك بأحد الدوائر الخدميّة وبتستنّى تقابل المدير من أوّل النهار ، بس للأسف .. ردّ السكرتير بعد طول إنتظار ... المدير مشغول ..! مع العلم إنّه قاعد بيتغدّى ..!!! كمان مش مشكلة اتذّكر حالك لمّا كنت وزير  إيش كنت تساوي بالمواطنيين ... نزلت على السوق بدّك تشتري للمدام أكم غرض  من السوق الشعبي ... الأسعار بتقلب طاقيّة الراس ، وتضطر لأن تصطف الطابور عند مطعم الفلافل ، مش مشكلة هو حال السّواد الأعظم من أبناء هذا الوطن ، وصلت للبيت وزوجتك وجعتلك راسك بالحكي والزّن ، مش مشكلة هو حال معظم زوجات المواطنيين ، لا يتوقفن عن الكلام  والشكوى  .

 

   ولو إبنك مريض أكلت هوا وإنتا بتلاخم من مركز صحّي ، ومن مشفى حكومي لآخر  ، مش مشكلة هو حال معظم الأردنيين ،  وبعد مرور إسبوع معالي الوزير على مغامرتك ما هو إنطباعك ..؟!  هل أنت بحاجة لطبيب نفسي بعد الكابوس المزعج الذّي تتمنّى أن لا يعاودك مجدّدا لقد كنت في تجربة لمدّة إسبوع وأظنّه أسوأ كابوس لا تتمنّى رؤيته..!!! لكن ماذا بالنسبة للمواطن الّذي كُتِب عليه أن يرى هذا الكابوس المرعب طيلة أيّام حياته..؟!!!.