صحيفة السوسنة الأردنية

بعد مرور اكثر من اسبوعين من اجازتي بالاردن,,,  اجا ببالي اروح ع دوار عبدون,,,  اللي يعتبر  محطه من محطات ومراكز الفياعه اللي بالاردن (ع شو والله مني عارف!!!),,, و على قد ما سمعت عنه انه دوار غير شكل ومعظم الشباب دايما بروحوا لهناك يفيعوا,, وقلبوا طاقية الواحد فيه ...فقررت اروح لهناك وخصوصي صارلي اكثر من سنتيين ما اوصلته ...... فطلبت من ابن خالتي يرافقني لغاد بسيارته,, واكيد هوا اللي ساق لانه عنده القدره الكافيه بدخول الدوار مزوبع ,, والنط من مسرب لمسرب بسرعه ومهاره عاليه , والهروب من الحفر اللي بالشوارع , وطريقته الرهيبه بالتزمير مع اخراج ايده من الشباك لتسهيل ولتخفيف من شدة المعارك والمصارعه  اللي بتصير جوا شوارع عمان.

اوصلنا دوار عبدون ....وعلى بعد مسافه 153 متر بالزبط ....قام ابن خالتي  صف سيارته المتواضعه اللي من نوع "" كيا "" او "" كي اي ايه ""   ثلاث حروف مقسمه  لاعطاء هيبه للسياره مثل عبارات:: "" بي ام دبل يوو"" او "" جي ام سي "" ...., وسألته لويش صفّينا بعيد عن الدوار ؟؟ جاوبني مع رفعت راس "" انسى ابن خالتي "" ..ما بعرف ليش انسى ,,,بس انسيت.

امشينا 153 متر للدوار ودخلنا على "كافي شوب" مشهور موجود ع دوار عبدون ....وما كان في مجال لقعده برّه ,,,فاضطرينا نقعد جوا ,,.ونزّلنا ارقيله مع قهوه وقعدنا ع ابو نص ساعة زمن و بعدين فرفطت روحي وقلت لابن خالتي قوم خنقعد بره ع الدوار انشم شوية هوا ..طلبنا الحساب .وطلعت الفاتوره بمبلغ وقدره "على ايش مش عارف" .. وطلعنا  بسّطنا ع الدوار .

وبما انه دوار ....الاشي الوحيد اللي رح اتشوفه السيارات اللي بتلف الدوار.... واول ما جذب انتباهي انواع السيارات اللي كانت اتمر ع الدوار  ....... اشي رينج روفر.. مرسيدس..بي ام ...بورش ...تقريبا كل انواع السيارات الفخمه  المتواجده بدبي....بس الاشي اللي مخول عقل الواحد .... انه هاي السيارات عليها نمر اردنية .... يعني اقل سياره حقها 80 الف نيره.... وهون انا شدّيت حالي... وركزت بالموضوع ... واختصرت ونزّلت اجري عن اجري الثانيه ... وقعدت اركّز بالسيارت اللي بتمر ... اللي كنت اركز فيها ع ثلاث شغلات... نوع السياره  و النمره .. واللغم اللي بسوق السياره( وبالنسبه ل "اللغم " هذا بده موضوع لحاله).

بعد اكثر من ربع ساعه مراقبه وتركيز للسيارات الفخمه  الرايحه والجاية .... اعرفت ليش ابن خالتي صف سيارته بعيد عن الدوار... وبعد بشوي قمنا اتمشينا  على الدوار فلاحظت انه كثير شباب كانوا قاعدين ع الدوار.... اللي جايب ارقيلته والغاز تاعه ,,, واشي جايب شوال بزر وقاعد مع اصحابه ,, واشي جايب اولاده وبناته وقاعدين  ,,,وهون انا بطّلت اميّز شو مفهوم الفياعه والطشه على الدوار؟؟ هل المقصود فيه القعده نفسها اللي ع الدوار(اللي ببلاش) ولا القعده بالمقاهي والمطاعم اللي حويلا الدوار(اللي فيها دفع )؟؟؟,,,,ومشان ما اوجّع راسي ... قلت لابن خالتي قوم خنروح نتعشى بمكان متواضع فيه  حمص و فلافل وبلا كل هالسولافه الطرمه كلها .

وهون حكومتنا على هذا الدوار  بتيجي بتقعد وبتتخذ قراراتها برفع الاسعار,, وبفكروا انه كل الشعب الاردني عايش مثل اللي عايش على الدوار,,, ولو ينزلوا يمشوا بس 153 متر تحت الدوار كان شافونا وشافوا  الشعب بالزبط شو عامل.... ويمكن كان اتغيرت قراراتهم برفع الاسعار,,,,,بس المشكله هذول جماعه ما بنزلوا ,,هذول بس بطلعوا  طلوع او  بمضوها قاعدين على هالزفت هالدوار.