صحيفة السوسنة الأردنية

أريد أن أحكي لكم قصة زواجي بالمختصر .. ومن الآن ..من لم يعجبه الموضوع ..أو ليش كاتبو ..أرجوه أن يقفز عن المقال ..لأنه لا يوجد لديّ أيّة إجابات على أيّ اعتراض عند أيّ واحد منكم ..إللي يراه فنطزة فليكن فنظزة ..وإللي شايفو ذا هدف فهو كذلك ..: -

شُفْتها ..ويا زينها لمّا شُفْتها ..حبيتها ..ما حبتني ..لأنها ما بتعرف إني بحبها ..،، مرت سنين ..نسيتها ..وهيّ لم تنساني لأني ما كنت موجود بحياتها حتى تنساني ..،، بعدها ..شُفتها مرة ثانية ..وحبيتها مرة ثانية ..بس ظل حب من ( ترف ) واحد ..،، رُحتلها ..طلبتها من حالها .. رفضتني ..ما زعلت ..لأنها ما بتعرفني كثير..،،

صارت تجمعنا النشاطات العامة ...أخيراً عرفتني جيدا ..فشدّيت حالي و طلبتها ..ما وافقت..،، تنكّس محسوبكو ع?Z الآخر ..،، بعد مدّة ..طلبتها من حالها ..وافقت ..بعدها ( بطّلت) أنا ..،، بس تندمت بسرعة ..رجعت طلبتها .. لقيتها ( بطّلت ) عني ..،، بعد مدّة ..وافقنا بدون ( تبطيل ) ..رحت طلبتها من أهلها أخيراً .. وافقوا بس واحد من أخوانها ما وافق ..،، بعثتلوا ناس ..وافق بالأخير ..الحمد لله ..،، راح قام أخوها الثاني ( بطّـل ) ..بعثتلوا كمان ناس ..وافق بالأخير كمان..،، حددنا موعد الخطبة ..اختلفت أنا وهي ..بطّلت هيّ ..بعدها حلّينا الموضوع ..حددنا موعد العُرس ..اختلفنا على الصالة ..بطّلت أنا : أنا مش تبع صالات .. بعدها ...حلينا الموضوع بإنو نجرب بعض سنة.. وتم العرس ..بعد اسبوع بطلت هي..تصالحنا بعد ساعة ..،، وبعد شهر بطلت أنا ..تصالحنا بعد ساعة .. ،، بعد سنة صارت حامل ..اتفقنا نترك بعض بعد الولادة ..بعد ساعة بطّلنا عن تبطيلنا ..،، خلّفنا ..بغداد .. وجيفارا ..و..وطن ..وما زلنا كل اسبوع نبطّل ونرجع لبعض بعد ساعة..،،

لا أعرف والله لماذا أسوق لكم حكاية التبطيل و التبطيل عن التبطيل ..بس كأني حاس إنها تشبه وضعاً عربيّاً معيّناً ..بس أي وضع بالضبط ..؟ أي وضع يا كامل ..؟ أي وضع ..؟ مش عارف ..واللي عارف : رجاء حاراً ما يحكيلي لأني يجوز هالمرّة أبطّل عن جد و يزبط التبطيل و ينخرب بيتي ...،،، الدستور