صحيفة السوسنة الأردنية

زمان كانوا اهلنا ينشور غسيلاتهم بهالحوش واحيانا يرشقوهن بداير هالبيت على صحاره او باب نمليه مخلوعه او مورينة خشب لقيها الولد بالحاره او على هالشباك ، والي معاه شوية مصاري كان يعَملوا منشر غسيل على هالسطح وبهيك بنكون نشرنا غسيلاتنا عن عيون نسوان الحاره واهلها، واتكافينا شرالقال والقيل وفلانه غسيلها وسخ وفلانه نص نص وفلانه ناشره الشرشف امبارح  كاين عندهم كذا وكذا.




وكل هذا يا عربنا بَنعرف من هالغسيلات الي بنفكرهن شوية شرايط منشورات تا تضربهن شوية شمس وينشفن وبنلمهن ، وكل هذا وشو ما كانت سولافة الغسيلات بتظل السولافه بالحاره وما بتطلع برات الحاره لآن اهل الحارات( الاحياء)كانوا ايطمطوا(يستروا) على بعضهم مهما صار بينهم قَدام الحارات الثانيه لان سمعة حارتهم بتهمهم  يعني كانوا واعيين انو الفضايح ونشر الغسيل الوسخ بأثر عليهم ..ليش ؟لأنو اذا واحد من حاره ثانيه عندو نية جيزه(زواج) وبدو يتجوز بدَور بعيد عن حارتهم ام غسيل وسخ وبالتالي بحسبوا حساب انو  بنات الحاره عرضه للعنوسه وما حدا بقَرب منهن وبعدين بقعدين البنات بوجَهم ، وبعدها يترتب على العنوسه ما يترتب.




 واذا كانت ختياره من هالحاره عندها بقره بتبيع شوية حليب وجبنه و مشتقات اخرى ببطل حدا يشتري من عندها لأنو الناس ما بشتروا من عند الي مش نظيف وعلى هيك يا اما هالختياره بتبطل تعتني بالبقره وترعاها وبتتركها تموت او بتبيعها(يعني بوقف الانتاج) وبهيك بتتدمر الحاره اقتصاديا ,ولو فكر شب عصامي يطلع من الحاره(يتغَرب) ويدَورلوا على شغل براتها بمطعم مثلا ويقدملهم السي في( السيره الذاتيه) تبعته ويكون كاتب فيها مكان الميلاد الحاره ايها ام غسيل اكيد رح يكحشوا وبزمر بلدي ، وبالتالي  بتخرب الحاره والكل بصير ايدور الهرب والفليله منها  وبتضيع الحاره والي بظل قاعد فيها بندب وبلطم ليش ما نظفوا الغسيلات وليش ما منعوا الغسيل الوسخ من النشر.




يا اعلامنا العزيز عندما نتحدث عن المنتوجات الزراعيه وكأنها ملغمه بقنابل كيماويه وهو كلام غير صحيح حيث ان النسب المستخدمه عندنا هي اقل بكثير من النسب المسموح بها عالميا وتستخدم عند دول اخرى بدون رقابه وما بنشورا غسيلهم ، فلنراعي ان الأنتاج  الزراعي يعيش عليه الاف الأسر(االتصدير الزراعي بح)، وعندما نتحدث عن خطأ طبي على انه ظاهره منتشره في بلد اصبحت السياحه العلاجيه فيه تشكل احد اهم مصادر الدخل للوطن والمواطن فأنما ذلك يدل على ان هنالك غاية ومأرب او قلة وعي وكلاهما مصيبه فالاخطاء الطبيه موجوده في كل مكان وعندنا هنا الاقل نسبة في العالم .




 وعندما نتصبح وبالمنشات العريض عن مشكله ما بين شخصين او مجموعة اشخاص في مكان ما في بلدنا على انها حرب وغزو قبائل على بعضها في القرون الوسطى كأنما نقول للدول التي تفتح ابوابها لأبنائنا للتوظيف ومنحهم فرص عمل لديها اننا جماعه راعين هوشات ومشاكل وبالتالي خلي اولادكو عندكو عمي احنا مش ناقصين وهات قطبها عاد شباب مصَبره فوق بعضها وبندوره مخَمجه ومستشفيات واطباء اكفاء بنشوا ذبان وكل هذا من ورا هالغسيلات .........