صحيفة السوسنة الأردنية

فاتَخِذوه عَدوا.....


"يشاهد إبليس الشيطان وهو يحزم أغراضه، ويغادر المكان"


إبليس: وين وين. وين رايح؟ وشو القصه؟


الشيطان: هلا.هلا. رايح أدور مكان جديد.زهقت وطالعه روحي من قلة الشغل.


إبليس: معقول، تخيلت انك شغال، وأمورك تمام، ومحتاج وقت أكثر.


الشيطان: لا ،أبشرك، الأمور أسهل بكثير مما توقعت. الشباب رايحين فيها. أروح أوسوس للشب والبنت، يعلموني الوسوسة و"الشيطنه". أقنعهم يدخنوا ويحششوا، ألاقيهم "سوكرجية" من الطراز الأول. أروح أقنعهم يصاحبوا بنات أو شباب، ألاقيهم مصاحبين عشرة،أخطط أقنعهم بتأخير الصلاة، الاقيهم أصلاً مابيصلَوا. وبسلامة الأغاني، والفيديو كليب، والقنوات الفضائية، والانترنت، والشات، والحفلات المختلطة، والنوادي الليلية، والأسواق، كلها عوامل ساعدتني في تحقيق أهدافي وبسرعة غير متوقعه، وبصراحة زهقت القعود.


إبليس: عال. عال. طيب طمني، شو الأخبار؟ كيف أمور الأكل ،والشرب، واللبس، والسكن، والوضع المادي معاك؟


الشيطان: كله تمام. الأكل والشرب " من الآخر" . فطور وغدا وعشا على حساب الغانمين ومن أحلى الأصناف. الناس تأكل وتشرب من غير ماتسمي. حتى وزني بصراحة زاد كثير. ألبس أحلى اللباس، وأشارك الناس غرف نومهم. الوضع المادي"
Top " ، مشاركين الناس فلوسهم: قروض ربوية، صفقات مشبوهة، بورصات، غش تجاري، وداخل شريك إستراتيجي في أغلب المعاملات التجارية المحرَمة.


إبليس: أخبار حلوة كثير. بس ماخبرتني عن طبيعة الشغل وكيف ماشية الأمور وبالتفصيل لو سمحت؟


الشيطان: أهم شي في شغلنا البنات، بنحاول دائما نقنعهم بصغر السن ، والبعد عن الموت ، وبنعزف على وتر الجمال، بنشجع الاختلاط، والحفلات، والطلعة من البيت بمكياج كامل، وتكوبن علاقات وصداقات عن طريق التلفون والانترنت يعني مايخفاك الحال. والجميل في الموضوع إنه البنات كثير متعاونين معانا ويساعدونا في إغواء عدد كبير من الشباب وفتنتهم، وتضييع وقتهم على المسلسلات والبرامج الشبابية الجديدة.


إبليس: على طاري الشباب، شو عامل معاهم؟


الشيطان:لا . "حط اديك ورجليك بمية باردة". ركزنا معاهم على تأخير الصلاة، وتأجيلها، وبعدين تركها، ونجحنا بنسبة كبيرة. الشباب مابيسمعوا غير أغاني" والقرآن إنسي موضوعه، بيسمعوه مره لما يموت حدا من الأهل والقرايب . وبنشجعهم على الاختلاط والعلاقات المشبوهة ، وحضور حفلات ماجنة، والدخان والحشيش، يعني ماخلينا من جهدنا جهد، وبصراحة تعاونهم معانا كبير جدا وملفت، ومو عارفين كيف نشكرهم صراحة.


إبليس: عال عال. أخبار كثير ممتازة. طيب ماخبرتني عن أهم المشكلات والمصاعب في الشغل.


الشيطان: بشكل عام الأمور ماشيه، لكن الجيل القديم من الرجال والحريم صراحة هلكونا، وطيروا عقولنا. عجزنا نوسوس، ونغري، ونقنع ، ولاحياة لمن تنادي، بيصلوا الخمس فروض، والمسبحة مابتفارق أيديهم، كل حركة بيسمي و الذكر مابيفارق لسانه ، صدقني أحيانا بنموت من الجوع، والبرد، ومابنلاقي محل للنوم بسبب ادعيتهم وذكرهم.


إبليس: أيوه، وشو كمان؟


الشيطان: كمان في جيل جديد من الشباب والبنات ملتزمين وسببوا لنا الصداع، وما قادرين نوصل معهم لنتيجة، رغم انه الجو مشجع ومناسب، والظروف جداً ملائمة للانحراف.


إبليس : هذا بيت القصيد،. لازم نطور أساليبنا، ونحاول تضييعهم بأي طريقة.


" فجأة ، تمر طالبة جامعية جميلة وملتزمة، تبدو عليها علامات الحشمة والوقار والأدب"


إبليس: ولك مين هاي ؟


الشيطان: واحده من الجيل الجديد الملتزم. صار لي شهر بحاول معاها تشيل هالحجاب، بلا فايده، او حتى تحط شوية مكياج" لاحياة لمن تنادي" ، حتى الحفلات، عجزنا معاها تحضر حفلة مختلطة، أو حتى تقعد في كوفي شوب مع شاب في الجامعة،" ولا حدا هون" راسها يابس، والكارثة إنها عصرية، وتستخدم النت، وتدخل الشات، ومعاها خلوي ،وعندها صاحبات أجنبيات، ومع ذلك ملتزمه، وصعب نوصل معاها لحل.


إبليس: شوف شغلك، وظلك وراها وراها، مو ناقصنا وجع راس. ولا تنسى الموضوع الأهم" المتزوجين" .أنت عارف أكثر شيء بيسعدني انك تفرق بين أثنين متزوجين.


الشيطان : لا توصي حريص. أقنعنا كثير من الرجال بضرورة بناء علاقات خارج الأسرة ومع نساء أجمل من زوجاتهم، وعن طريق الشات والنت ، صاروا يتعرفوا ويتزوجوا مما هب ودب. والأمور ماشية. وخربنا بيوت كثير خلال الفترة الماضية. بالنسبه للزوجات، أولوياتنا معاهم إقناعهم بالخروج من البيت مع المكياج والعطر والزينة ، وإهمال الصلاة عن طريق شغل البيت، و مكالمات الخلوي الطويلة، وتضييع الأولاد، وقلة الاهتمام بالزوج ومطالبه . وهدفنا الإستراتيجي هو خراب البيوت، والتفريق بين الزوجين، والطلاق، وبالنهاية نشر الفاحشة.


"فجأة يخرج أبو صالح من بيته، يذكر الله،ويقرأ أذكار الصباح ، والمعوذات بلهجته العامية البسيطة. يهرول الشيطان وإبليس بعيداً وهم يتهامسون:


إبليس : بعد إذنك ، عندي مشوار لمجموعة من البنات تحجبن جديد ، وكثير زعلان، ولازم أشوف شغلي معاهن.


الشيطان: ماشي ، وانا رايح حفلة مختلطة، وبعدين السوق، فرصتي اليوم آخر الشهر، والناس "فايعه".


لا أدري لماذا لانبكي من الآية التي أبكت إبليس، ولماذا لانركز جيداً في معانيها؟


قال تعالى :وَالَّذِينَ إِذَا فَعَلُوا فَاحِشَةً أَوْ ظَلَمُوا أَنْفُسَهُمْ ذَكَرُوا اللَّهَ فَاسْتَغْفَرُوا لِذُنُوبِهِمْ وَمَنْ يَغْفِرُ الذُّنُوبَ إِلاَّ اللَّهُ وَلَمْ يُصِرُّوا عَلَى مَا فَعَلُوا وَهُمْ يَعْلَمُونَ * أُوْلَئِكَ جَزَاؤُهُمْ مَغْفِرَةٌ مِنْ رَبِّهِمْ وَجَنَّاتٌ تَجْرِي مِنْ تَحْتِهَا الأَنْهَارُ خَالِدِينَ فِيهَا وَنِعْمَ أَجْرُ الْعَامِلِين." صدق الله العظيم
إن أفضل وقت لاتخاذ قرار التوبة ، والعودة إلى الله سبحانه وتعالى، و البعد عن الشيطان، هو هذه اللحظة، فلا تتردد .




ا