صحيفة السوسنة الأردنية

اليوم مساء سيعلنون ارتفاع المحروقات ..وأنت يا مواطن ما عليك سوى أن تستقبل هذا الارتفاع وأنت جالس على كرسي و ( حاط رجل على رجل ) وما تنسى الابتسامة ..،، أو عليك أن تفتًّل شواربك وتقول للارتفاع بصوت الواثق : ترتفع و إلاّ ما ترتفع ..ما طار طير وارتفع إلا كما طار وقع ..،،

يعني عليك أن تستقبل ارتفاع الأسعار بروح رياضية ..أما كيف الروح الرياضية هاي ..؟ أنا سأقول لك ..: روح و ابحث لروحك عن ( بوط رياضة ) على مقاسها تماماً و اجعل روحك تلبسه ..و خلّيها تنطنط و تضرب شلاليط ..هيك بتصير روحك رياضية..،،

لازم تتعامل مع الارتفاع باعتباره ضرورة وطنية لا بدّ منها ..،، وما ينتج عن الارتفاع أيضاً ضرورة ..،، فبحثك عن رغيف خبز زيادة ضرورة ..،، ص?Zفْت?Zكْ للسيارة بجنب الدار و ما تشغلها ولا تحركها ..ضرورة أيضاً ..،، تأجيلك للذهاب لدار أختك إللي ما زرتها من زمان ضرورة ..لأن الزيارة زمان مكلفة : فكيف الآن بعد الارتفاع ..،، شكواك الدائمة من كل شيء هو ضرورة الضرورات ..بس هالمرّة بدنا إياك تشكي بلحن جديد من باب التغيير فقط لأن الألحان القديمة صارت مملة وروتينية..،،

المهم و بلا كثرة حكي ..بدي أروح أشتري علبة شامبو ..و شفرة حلاقة ..و قزازة عطر أم الليرة ..وبدي أحاول : مجرد محاولة أن ( أنعًّمْ ) بالشفرة ..و أتحمم ..و أتعطّر ع?Z الآخر ..و ألبس أجمل ثيابي إللي ما عندي غيرهن ..وأستقبل الارتفاع وأنا بكامل تأنقي ..لأنه من العيب أن يطل علينا الارتفاع من وقت لآخر ولا نكرمه ولا نقوم بالواجب معه ..على الأقل نستقبله بوجه بشوش ..،،

باي ..مش فاظيلكو هسه ..بدي أروح أهندز حالي على سنجة عشرة..،، الدستور