صحيفة السوسنة الأردنية

زياد البطاينة

معجزة وانا بعرف انه المعجزات انتهت عالارض بس شو بدي اسوي ارض حاكورتنا نطقت وسالتني بعد بتحب هالبلد ولا مثل غيرك سميت بالله وقلت بحبها بحبها بحبك يا بلدى . بحبك أكيد بس عتبان عليك اسمحيلى أشكي بعقل إنتى يا بلدي تغيرت ومابعرف شو غيرك حتى ناسك تغيرو وبكذبوا علينا وبقولو ظروف ياترى هالظروف ليش ماغيرتنا صرت اشوف فيك المحسوبية والشللية والوساطة والفساد وبشوف فيك الابكم و الضرير بس يا بلدي خايف أكون فيكى أسير و مقدرش أنطق زي ناس كثير ببلدي بيلجمها حبك يا بلدي ولساني اللي تعود عقول الحقيقة بخاف منه يغدرني يوم ويوصفك يابلدي كيف صرتي وصرنا وكيف كنت وكنا وكيف اتغيرت بيوم وليله غيروك الكبار غيروك التجار حتى الحجار وشو لازم يصير مرعوبين خايفين بخافوا ينفضح سرهم و بطلبوا مني انافق حتى اصير كاتب كبير ولا أرشح نفسي للنيابة او للمدرنه او للمسؤوليه وفي الآخر أندم على حبك يا بلدي انا صرت اخاف ياحنونة و أتمنا أكون أبكم أو حتى ضرير واتمنى اليوم ما افتح فمي لاني بخاف اصير كناس شوارع و أنام على الرصيف ولوغمضت عيني يا حنونة راح يتهمني البعض باني امي اوجاهل او خاين اواجير وانضم لقوافل العاطلين عن العمل وسكان القهاوي بحبك يابلدي وبعلموني كيف اسكت واكذب وازور وبقولوا ان سكت متاكد انه راح اوصل وممكن اصير بيوم وزير وامشي الأوامر لكن بخاف انساك وانسى نفسي واهلي حتى اولادي وانسى الواجب والضمير ,واتمسك بالكرسي حتى لو كان دوار لانه راح اتعلم كيف بتشبثوا فيه واطيع الاوامر وانسى واغرق بالنسيان احسن انطرد من الوزارةو أخسر كل ما وصلت له اخسر كثيرأخسر المنصب والجاه والمكاسب والعزايم واخسر امرك معالي الوزير او يفرطوا هالمجلس وارجع زي ماكنت وبكونو الكل عرفوني خدعتهم وماسويت شي ووعودي كانت مفبركه رتبها اللي لاوفقه الله واحد كاتب متخصص بالضحك على الدقون و تتشال عني الحصانة وأتعامل أقل من الغفير واصير اضرب كف على كف وارقص على الدف واقول ياريت اللي جرى ماصار

يا بلدي الحلو زمن الرجولة و الكلمة التمام ,ولى حتى الامل والطموح والرغبة والحماس حتى الحلم ولى ,وراحت حكومة واجت حكومة والموظف صار وزير وكل حكومة حملت النا برامج وامال واحلام صدقنا رغم ان المؤمن لايلدغ مرتين وصرنا متعودين على اللدغ وماعاد ياثر فينا هللنا للوزرا والنواب ومشاريع القوانين وكل وزير بنصفق له ولما يروح بنبعصله وبنلعن تلتميسه وبنلعن الزمن

والقوانين اللي مابتتنفذ الا على الصغار اللي مثلي لانه الحلم بعده حلم ماكبر ظل صغير وما تحرك من مكانه وظليت ساكت بشوف بعيني وبحزن بقلبي وخليها بالقلب تجرح ولا تطلع وتفضح بشوف الجوع بنهش بطون الصغار اللي بتضمر وبشوف كروش بتتدلى وبشوف مرضى كثير اشي سرطان واشي سل واشي انفلونزا الطيور واشي انفلونزا الخنازير وبشوف شباب مثل الورد بتودعك يا بلدي ودموعها بتغسل اعتابك وبشوف ختيارية بلدي بموتو وعيونهم عباب الدار بلكي يرجع الغايب بشوف نسوان بلدي حزينه وختيرت قبل اوانها ورقابها تجعدت وعيونها غارت وبعد لسانها بسال ياترى بتوظف ابني ياترى بزوجه ياترى برجع يا ترى بلاقي شغله ياترىبس يتخرج ياترى وتاري الصوت مابرجع منه غير الصدى ومطلوب مني

مطلوب مني أسكت و أعبر من جديد عشان فيه حرية و مفيش هناك تعبير و أشكر المحرر ورئيس التحرير واشكر المسؤول وا قول كالعادة مشان اصل لازم لازم انافق لازم اكذب لازم اداهن ولازم اعمل زي التمثال اللي حاطه الاخ قرود لابتشوف ولابتسمع ولابتحكي بس هالكار مش كاري ولا هو طريقي

انا مع اللي ظلوا يهتفوا وعلموني وبعدهم بهتفوا ومش عارف بكذبوا علي ولا على حالهم الكفاءة المقدرة الابداع التميز الرجل المناسب

بس صدقيني بحبك يا بلدى بحبك كثير واللي بحب ما بزعل بس بعتب وانا عتبان عليك يا بلدي عتاب كبير بحبك أكيد بحب كل حبة تراب ورمل بارضك بحب بطنك الشريف بحب الغور بحب الوادي بحب الجبل بحب السهل بحب الصحرا و أشكي إليها واحكي لها وانا عتبان ليش يابلدي صرت هيك بحب الشوارع الطرقات أحب الحواري و الميادين و أحب القهاوي و ضحك الصحاب بحب صحن الحمص والفول والفلافل بحب اسمك كل هذا وبعدني بسمع و أسمع وشوف نشرة الأخبار قروض وفساد ورشوه وديون وتعيينات وتجاوزات وهجرة وعذاب والم بطالة و غلو في الأسعار و مفيش حد يرحم,ارحمونا يا ياحكومة ارحمونا يا كبار

بحبك يا بلدى بحبك أكيد و لي عليكى عتاب كبير والك علي حق المفروض إني أصبر والمفروض إنى أضحك و قول بكرة تفرج و مستني يوم جديد بحبك يا بلدي بحبك واللي بحب مابكره واللي بحب بسامح وزي ماعيوني بتنطر ابني بعودته من الغربة راح تظل تحرس بلدي من كل شر ياكل الناس اللي مروا بلدي وسكنوا بلدي وحبو بلدي بلدنا حلوة والامل كبير بلدنا حلوة واحنا سياجها مهما تغيرو وتغيرت الاحوال بنظل اردنيين وبنحب بلدنا وبنعشق دحنونها وبنركع على اعتابها وخلنا نعلمهم حب الوطن كيف يكون ومابدنا نائب ولاوزير ولا كرسي دوار خليها لغيرنا بدنا نكون نخيل متجذر وحجار مزروعه بارض بلادي وحبات تراب ورمل وجرس ينبه عشاق بلدي ومدرسه تعلم حب الاوطان

pressziad@yahoo.com