صحيفة السوسنة الأردنية

من اجل الاصلاح يا دولة الرئيس ومن اجل ان نبدأ في الطريق الصحيح شو رايك لو نخفف من النمرة الحمرة اللي (معبية) الشوارع......أو مثلا لو غيرنا السيارات المرسيدس بسيارات هونداي اكسنت.....ما انت بتعرف البنزين (السوبر) غالي.....يعني والله يا دولة الرئيس كثير النمر الحمرة بالبلد.....وخاصة اللي بنشوفها بالليل وراكبينها عائلات طبعا مش أي عائلات بس يعني بدها شوية اقتصاد.....يا دولة الرئيس كل واحد في هذه البلد يحتاج اليوم للنمرة الحمره وبنزين بدون ما يدفع حقه....فمثلا الجيب بتمشي بالتنكه 120 كيلو والاكسنت بتمشي 250 يعني الضعف وانا اعلم انها الاكسنت مش (مده) يعني مش قيمة لعطوفتهم ومعاليهم وسعادتهم بس والله بدها شوية حس وطني.
يا دولة الرئيس انا لست بحاقد ولا بحاسد ولكن كيف للموظف الذي يتقاضى 300 دينار وبداوم بمحافظة غير محافظته ان يتنقل بالمواصلات يوميا في حر الصيف وبرد الشتاء.....وكيف للذي يتقاضى الالوف أن يركب المرسيدس والجيب وغيرها من الانواع الفاخرة والتي اشاهدها فقط عندما يلفت انتباهي نمرة حمرا.
يا دولة الرئيس اياك ان تشك للحظه بحبنا وانتماءنا لهذا الوطن .....ثم اياك ان تعتقد ان من يقودون النمر الحمرا هم افضل الموجود على ارض الوطن.....فهذا البلد ما زال ينجب النشامى الذين عجن حب الوطن بارواحهم......طيب مهي رواتبهم طايره كثير وبقدروا يشتروا سيارات واذا بدهم بدهنوها احمر.....بس ما احنا بنحكي عن عجز ومديونية وظروف اقتصادية....طيب شو المشكله لو معالي الوزير أو سعادة المدير أو عطوفة المحافظ راح بسيارتة مشوار وتكون نمرتها بيضا؟؟؟أو مثلا لو الله يرزقنا بوزير يرفض استخدام سيارة الوزارة كرما وتطوعا وشعورا مع الوطن.....حتى لو تواضع سواقين الوزراء واصحاب السعادة والمعالي والعطوفه وما يلفوا بالسيارات كل عمان عشان يجيب قهوه او فطور......يعني مش شايف في مشكله اذا تكرم احدهم وكان هو المبادر بنفسه ليقتدي الصغار به......يعني معقول يصير عندنا هيك....والله لو يصيرهيك غير تزبط معنا وبالناقص من النمرة الحمرا.
يا دولة الرئيس المال العام امانة في عنق كل موظف مهما صغر او كبر منصبه .....المال العام ليس عملة ورقية او معدنية فقط ....انها كل شيء تحت مسمى هذه البلد....انها سيارات وقرطاسية ....انها انترنت واجهزة .....انها كل نقابله من الباب للمحراب....وعلينا ان نقطع كل يد تمتد الى المال العام مهما صغر او كبر.....ومن حقنا ان نعري كل نفس دنيئة تمتد للوطن باي طريقة كانت.
يا دولة الرئيس اتمنى من كل قلبي لك ولمن ياتي من بعدك أن يعينكم الله على تحمل هذه الامانة .....وأن يحفظ بلدنا من كل سوء ومن كل شر ....وان يديم الله علينا نعمة الامان دائما وابدا.....وبالمناسبة نمرة سيارتي ما زالت بيضاء.