صحيفة السوسنة الأردنية

حاله من الذعر والقلق تعيشها العائلة قبل النتائج بليله.... نوم ما فيش واحيانا يلف العائلة نوم من نوع نوم قريعون... اشي صاحي واشي بطِلّ من تحت اللحاف.. الجميع ماسك التلفونات وكل ما حدا ضحك او زعل بكون الجميع فوق رأسه.... خبّر شوه طلعت النتائج؟ المهم بكارج القهوه معبيه المكان... بتتطرجل بفناجين القهوه من كثرها.. ميمعه وقايمه، واللي بزيدك قهر لمّا تفتح الفيس ويطلعلك... (بانتظار اعلان النتائج).

واللي بيقهر اكثر اذا سمعت صوت العاب ناريه بعرس الجميع بفّكر النتائج طلعت.... اشي بيركض لجوّا واشي بيركض لبرّا والمشكله الزحمه بتكون عند الباب والناس بتتشركل ببعضها، وبتمر هاي الموجه وبيطلع ما فيش نتائج..
المهم بيطلع النهار وبتذهب الناس عالمدارس مشان يوخذوا النتائج قبل الساعه عشره... هناك وين فيه جُميّعيه بيركض الطالب واخوانه عليها... اشي بيقول طلعن واشي بيقول خرب النظام واشي بيقول تهكر الموقع، بهاظ الموقف طالب التوجيهي بيكون مثل ام العروس فاضيه مشتغله.. حالته حاله وهو بالعاده ما بدّخن بيطلع السيجاره الإلكترونية وببلش يثعب عليها وما حدا قادر ايقوله يا مايله اتعدلي...

المهم بيفتح الموقع وانه معدله 59 علمي.

اهله بدهم اياه دكتور... بس النتيجه جابت خبره.. بيروّح عالدار اشي زعلان واشي فرحان... بسلّم على اهله وببوس ايد امه.. وبتفقعه مهاهتين ثلاث بتجيب خبره... وبعدها بدبّوا عمحل الكنافه وبيوصّوا عسدر ناعمه وسدر خشنه وبفيع الناس والجيران يباركوا لامه وابوه... بس عاد وين بدهم يروحوا فيه تا يقرا..... هون المشكلة
مبروك النجاح عموه وشيه غاد!!!