يوميات سالم - الحلقة 11

 يوميات سالم - الحلقة 11
الكاتب : أكرم الزعبي
(وبعدين مع هالحال يعني، يا زلمة اشتريلنا طنجرة ضغط) تقول زوجة سالم، (استعيريها من جارتك) يقول سالم ويضيف (ليش اشتريها وانتِ يا دوب كل شهرين تحتاجيها مرّة)، ثمّ ينادي على ابنه اليافع (يابا يا محمود روح على بيت جيرانّا وجيب من عندهم طنجرة الضغط)، (اوهوووو، يعني ما في غيري يظل يروح عليهم، والله صرت استحي، جيب طنجرة ضغط، جيب مجرفة، جيب مشط أرض، جيب مفتاح غاز، جيب مبرد سكاكين، جيب جيب جيب....) يقول محمود حانقاً، فيما سالم يتناول (شبشب وقرود الدنيا بتطنطنط قدام عيونه).
 
يهرب محمود من أمامه، ويعود بعد دقائق حاملاً طنجرة الضغط بيديه الاثنتين وينادي (ياباااا، ياااااا)، (خير يا طير) يقول سالم، فيرد عليه ابنه (اتفضل، هاي جيرانّا اعطوني الطنجرة وسألوني إذا عندنا درِل، ولأني خفت يخربوه حكيتلهم خربان) ثم يُطلق ضحكة خبيثة.
 
(طالع لخوالك جدع) يقول سالم ثم يُضيف (مش عيب عليك يابا؟؟ ما خلّينا شي ما استعرناه من عندهم ولمّا يحتاجونا مرّة بنكذب عليهم؟؟ يا عيب الشوم، خذ الدرِل و طَلَق روح اعطيهم اياه).
....................
 
صدّقتوا إنه سالم ممكن يعمل هيك؟؟، لأ، لأنه إذا عمل هيك بصير سالم مش سالم.
....................
 
النهايه الحقيقية :
يهرب محمود من أمامه ويعود بعد عدة دقائق حاملاً طنجرة الضغط بيديه الاثنتين وينادي (ياباااااا، ياباااااا)، (خير يا طير) يقول سالم، فيرد عليه ابنه (الجيران طلبوا الدرِل) (وشو قلتلهم يابا؟؟) قال سالم، (قلتلهم خمس دقايق وبجيبلكو اياه) قال الولد.
 
(برافو عليك والله يابا، جدع طالع لخوالك)، يبتسم الولد وهو يعتقد أنه قام بعملٍ عظيم، لكنّ سالم يكمل (روح احكيلهم إنه خربان، لأنّه إذا صار واقع بايديهم مش رح يرجع لاسبوع).
يُطأطئ الولد رأسه ويقول (بس يابا انا....)، فيأتيه الصوت صارماً (انصرف من وجهي واحكي مثل ما حكيتلك).
 
#وبعدين مع سالم

أكثر الأخبار قراءة