صحيفة السوسنة الأردنية

إليوم الجمعة قبل رمظان ، كان في صلاة جنازة على حُرمة يا خالتي، الله يغفر إلنا و يغفر إلـــها ويجـعل مثــواها الجنة. آمين.

طلعت يا خالتي من إلجامع، و شفتــلك إلناس مثل النحل ملتمّه و ماسكة رجّال سارق من إلحاملين إلجنازة أكثر من ثلاث محافظ مصاري، و الناس نازله ظرب بالحرامي، و ماسكينُه من رقبته.

سمعت بعظ إلناس بتشتم الحرامي، مع إنها طالعة من الجامع !، يا إبن إل.... يا ...، ولك يا ... و الله يا خالتي إستحيت، و ذُبت بملابسي !

سألت ولد صغير عن الميمعه، حكالي مش بس واحد، هظول ثلاثة، و جماعته الحراميه هربوا يا خالتي.

الله يجزيهم إلخير الأمن الوقائي ، يا خالتي زي إلبرق شفنالك إياهم جايين بسيارة ، و كتّــــفوا إلحرامي و أخذوه معاهم عالمركز.

أنا و الله يا خالتي رجليّ سقطوا مني من إلمنظر، وصرت أفكّر بالمساكين صحاب المحافظ،. ويلهم المصاري إللي إنسرقت، ويلهم الرخص و الهويات و الأوراق إللي بتنسرق مع إلمحفظة و الحُرمه إللي ماتت. الله يرحمها. آمين

لازم يا خالتي إلواحد ينتبه كثير كثير وقت إلجنازات و غيرها.

شفت مرة واحد ختيار كان عنده معاملة في دائرة الأراظي، يا دوب قادر يمشي، لما سرقوا محفظته صار يلطم. و الله يا خالتي أعطيته مصاري عشان يروّح عالدار.

رنة موبايله حاطينله إياها إللي في دارهم أغنية نانسي عجرم: يا سلام يا سلام أد إيه حلو الكلام !

طب يا خالتي إللي بيسرق بعد صلاة الجمعة و صلاة الجنازة، و إللي بيسرق ختيار بجُر حاله جر من الكبر و التعب، بالك إللي من نفس إلنوع من البشر صعبه عليه إنه يسرق وظيفة أو ترقية أو أي حق للناس بشوفه قُدامه؟

كل عام و إنت بخير و الله يستر يا خالتي

 shafiqtdweik@yahoo.com