صحيفة السوسنة الأردنية

تحت مظلة الزينكو والتي تعود ملكيتها (والملك لله) لابو احمد صاحب الدكانة اللي بأول القرية.....تحت تلك المظلة التي عانت ما عانت من برد الشتاء وحر الصيف جلس أبو احمد صاحب الدكانة وصديق عمره أبو خالد وبالطبع الكراسي عبارة عن كراتين بيض فاضيه تم تطبيقها لتصبح كراسي (صناعه وطنية) .....




جلسه عادية مثل جلسات كل يوم بعد العصر ...والغريب انه أبو خالد حاط رجل على رجل على غير العادة ويحاول رفع الدشداش قدر الإمكان لينتبه أبو احمد فورا بحكم سرعة بديهته ويقول مبروك الكندرة يا أبو خالد.....الله يبارك فيك يجيب أبو خالد.....وبعد ترحيب استغرق أكثر من ثلثي الجلسة بما فيه دخول الأطفال للشراء.....




يبدأ أبو احمد بالحديث ويسأل أبو خالد سمعت آخر خبر .....هات لنشوف خير . هاظ بقلك خالد شاهين بألمانيا مين خالد شاهين يا زلمه تبع المصفاة أي مصفاة يا زلمة مصفاة البترول مالها المصفاة يا زلمه هاظ اللي كان محكوم وطلعوه من البلد طيب ليش محكوم يقولوا علية قضية فساد مين هو؟ يا زلمة اسمه خالد شاهين ماله هاظ بعدين معك بقلك عليه قضية فساد وسفروه عشان ما ينحكم طيب مين اللي سفره ما حدا بعرف لحد الآن طيب لما تعرف قلي المشكلة انه بسافر وين ما بده وما حد سائله مين هو؟




 يا زلمه نفسه خالد شاهين ماله؟ بسافر وين ما بده والدولة بتقول أنها متابعيته عشان ترجعه طيب شو بدهم الدولة منه عشان يحاكموه ليش شو عمل مهو بقولوا اخذ ملايين طيب شو دخلهم هو ماخذ منهم مهو فساد ما أنت بتقول من المصفاة آه مهي المصفاة كمان للدولة يا زلمة شو بدك فيه الله يعين الناس بعدين معك انت مش عايش بالدنيا مين انت مالني سلامتك ولا اشي بس ما فلتلي فكك من هالسوالف الفارطه يا أبو احمد كيف الكندرة الجديدة أي كندرة كندرتي الجديدة مالها مليحة؟ بس مش كبيره على رجلك صحيح بس سعرها رخيص إذا هيك مليحة